රාජ්‍ය අමාත්‍ය ධුරයෙන් ඉවත්කළ නීතිඥ සුසිල් ප්‍රේම්ජයන්ත් මන්ත්‍රීවරයාට ඊයේ (04) දුරකථන ඇමතුමක් ලබාදී ඇති අගමැති මහින්ද රාජපක්ෂ, සිද්ධිය සම්බන්ධයෙන් තමන්ගේ කනස්සල්ල පළකර ඇතැයි ආණ්ඩුවේ අභ්‍යන්තර ආරංචිමාර්ග පවසයි.
” ඔබතුමාව ඇමතිකමෙන් අයින් කරලා කියල මම දැනගත්තේ දැන් . ශිරන්ති කිව්වේ. ” යයි පවසා ඇති අගමැතිවරයා, හිටපු ජනාධිපතිනි චන්ද්‍රිකා බණ්ඩාරනායක කුමාරණතුංග තමන්ට 2005 දී ජනාධිපති අපේක්ෂකත්වය නොදීමට තීරණය කර තිබියදී අපේක්ෂකත්වය ලබා ගැනීමට සන්ධානයේ මහ ලේකම් ලෙස දුන් සහය අමතක නැතැයි ද පවසා ඇතැයි වාර්තාවේ.
” මට කවදාවත් ඔබතුමා එක්ක ගැටළුවක් තිබුනේ නැහැ. මාව අස්කළ එකට ඔබතුමා සම්බන්ධ නැහැ කියල මම හොඳටම දන්නවා. ” යයි සුසිල් ප්‍රේමජයන්ත මන්ත්‍රීවරයා එහිදී අගමැතිවරයාට පැවසු බවද ඉහත ආරංචිමාර්ග තවදුරටත් කියා සිටියි.
වහාම ක්‍රියාත්මක වන පරිදි සුසිල් ප්‍රේමජයන්ත රාජ්‍ය අමාත්‍ය ධූරයෙන් ඉවත් කිරීමට ජනාධිපතිවරයා ඊයේ කටයුතු කළේය.
නිමල් ලන්සා ගේ බුරියානි සංග්‍රහය !
මේ අතර ආණ්ඩුවේ ආරංචිමාර්ග පවසන්නේ රාජ්‍ය අමාත්‍ය නිමල් ලන්සා විසින් ඊයේ (04) රාත්‍රී සුසිල් ප්‍රේම ජයන්ත මන්ත්‍රීවරයා වෙනුවෙන් ඉන්දියන් බුරියානි සංග්‍රහයක් පැවැත්වූ බවයි. ඒ, කොළඹ රාමාඩා හෝටලය තුලදී ය.
ඒ සම්බන්ධයෙන් ‘ද ලීඩර්’ කල විමසීමේදී නිමල් ලන්සා ඇමතිවරයා පැවසුයේ, තමා ලක්ෂ්මන් යාපා අබේවර්ධන හිටපු අමාත්‍යවරයා හා නලින් ප්‍රනාන්දු මන්ත්‍රීවරයා සමග රාත්‍රී භෝජනය ගැනීම සඳහා රාමාඩා හෝටලය ගිය අවස්ථාවේදී සුසිල් ප්‍රේමජයන්ත හිටපු ඇමතිවරයා ද රාත්‍රී භෝජනය සඳහා එම හෝටලයට පැමිණ සිටි බවයි.
සුසිල් ප්‍රේමජයන්ත මන්ත්‍රීවරයා වෙනුවෙන් භෝජන සංග්‍රහයක් පැවැත්වූ බවට පැතිරයන කටකතාවල ඇත්තක් නැතත් සුසිල් ප්‍රේමජයන්ත තමාගේ හිතමිතුරකු බව ද ඔහු පැවසිය.
theleader.lk
