මීගමුව රෝහලේ වකුගඩු ඒකකය පිහිටුවා මාස දෙකක් වත් නැත . පසුගිය 27 දින වනවිට මෙම ඒකකය තුළින් රුධිර කාන්දුකරණය වාර 356 ක් සිදු කිරීමට හැකිවී ඇත . සාමාන්‍යයෙන් පුද්ගලික රෝහලක සිදුකළහොත් රෝගියෙකුට මෙම එක වාරයක් සඳහා රු. 8000/ කට ඉහළ මුදලක් වැය කිරීමට සිදුවේ. ඒ අනුව රෝගීන් වෙනුවෙන් මීගමු මහ රෝහල ඉතිරි කර ඇති මුදල් ප්‍රමාණය 8000 x 356 = රු. 28,48000/ කි.
අප මීට පෙරද සඳහන් කර ඇති පරිදි මෙම එ්කකයේ ඇඳන් 6කට අදාල උපකරණ යොදා ගනිමින් එක්වරකට රෝගීන් 6 දෙනෙකුගේ රුධිර කාන්දුකරණය සිදුකරයි . ඒ අනුව දිනකට සිදුකරන වාර ගනන 12 කි. නමුත් මෙම ක්‍රියාවලිය සඳහා යොදා ගන්නා මොනිටර් දෙකක හිඟයක් පවතින බවත් , ඒනිසා දැනට තාවකාලිකව ණයට රැගෙන එම අඩුව පිරිමසා ගන්නා බවත් මෙහි කාර්‍යමණ්ඩලය පවසයි . මෙම අංශය බාරව කටයුතු කරන ඩිලානි මහත්මිය සමඟ වෛද්‍යවරු 3 දෙනෙක් , හෙදියන් 6ක් සහ සුළු සේවකයෙකු වශයෙන් 10 දෙනෙකු සිටී.
මෙම ඒකකය පිහිටුවීමේ සිට මේ දක්වා මෙම කාර්‍යමණ්ඩලය කරන ලද කැපවීමත්, අසරණ රෝගීන් පිළිබඳව ඔවුන්ගේ ආකල්පය , ඒ අනුව රෝගීන්ට දක්වන කරුණාව , දයාව අගය කළයුතුය. මෙම රෝගීන් වෙනුවෙන් තේ එකක් හෝ ලබාදීමට හැකිනම් එය ලොකු පිනක් බව ඔවුන් පවසයි .
මේ සියළු දේවල් සඳහා අරමුදලක් ගොඩනගා ගැනීමට හැකිනම් එය වැදගත් දෙයක් බව ඔවුන්ගේ තවත් අදහසකි .
රෝගීන් මුහුණ දෙන තවත් ගැටළුවක් ලෙස වැසි දිනවලදී මෙම ස්ථානයට පැමිණීමට ඇති අපහසුතාවය දැක්විය හැක . මේ සඳහා මීටර් 10 ක දිගට සහ මීටර් 2 ක පමණ පළලින් යුතු කුඩා වහලක් අවශ්‍ය බව පෙන්වා දෙයි .
පවතින පහසුකම් අනුව සහ රෝගීන්ගේ ඉල්ලුම අනුව ඉන් 1/4 වත් සැපිරීමට හැකියාවක් නැති බව කාර්‍යමණ්ඩලයේ මහත්මියක් අප හා පවසා සිටියාය.
මෙම රෝගීන් පිළිබඳව අදහස් දක්වමින් ඇය ප්‍රකාශකළේ මෙවැනි අදහසකි . ” මේ අය මානසිකව වැටිල ඉන්නෙ . සමහර වෙලාවට රෝගියා ගෙදර ගෘහ මූලිකයයි. ඔහු තමයි පවුලේ නඩත්තුව කරගෙන ගියේ ඔහු අඩපන වුනහම එ් පවුලට සිදුවන්නේ කුමක්ද කියල හිතාගන්න පුළුවන් නේද? මේක ලෙඩක් නෙවෙයි . ඉන්ද්‍රියන් අඩපනවීමක්. යම් අවස්ථාවක හදිසි අනතුරු වලින් මරණය සිදුවූ අයගේ ඉන්ද්‍රියන් ලබාගත හැකිනම් එය උතුම් සේවයක්”
මරණය සහ ජීවිතය අතර රැඳිල ඉන්න මේ අසරණ රෝගීන් වෙනුවෙන් පවත්වාගෙන යන වකුගඩු ඒකකයේ මතුව ඇති ගැටළු විසඳා ගැනීමට කවරෙකු හෝ මැදිහත් වන්නේ නම් එය උතුම් සේවයක් වන අතර අප එවැනි පරිත්‍යාගශිලීන්ට මේ සඳහා ආරාධනා කරන්නෙමු .
