බන්ධනාගාරතුල කොවිඩ් 19 පැතිරීම පාලනය කිරීම සදහා ගත හැකි කඩිනම් ක්‍රියාමාර්ග පිළිබදව පැවැත්වූ සාකච්ඡාවල ප්‍රතිඵලයක් ලෙස වෛරසය ආසාදනය වූ කාන්තා රැදවියන්ට ප්‍රතිකාර කිරීම සදහා මෙන්ම ඔවුන්ගේ ආශ්‍රිතයින් නිරෝධායනය කිරීම සදහා මීගමුව පල්ලන්සේන තරුණ වරදකරුවන්ගේ විශෝධන මධ්‍යස්ථානය කාන්තා රැදවියන්ගේ නිරෝධායන හා ප්‍රතිකාර මධ්‍යස්ථානයක් බවට පත්කිරීමට බන්ධනාගාර ප්‍රතිසංස්කරණ හා සිරකරුවන් පුනරුත්ථාපන රාජ්‍ය අමාත්‍ය විශේෂඥ වෛද්‍ය සුදර්ශිනී ප්‍රනාන්දුපුල්ලේ මහත්මියගේ උපදෙස් පරිදි බන්ධනාගාර දෙපාර්තමේන්තුව විසින් කටයුතු කරන ලදි.
ඒ සදහා අවශ්‍ය ඇදන්, මේට්ට, කොට්ට, බෙඩ්ෂීට් අතුළු වෛද්‍ය උපකරණ සෞඛ්‍ය අමාත්‍යාංශයේ සහයෝගයෙන් ලබාදී ඇති අතර කාන්තා රැදවියන් 240කට මෙහි නිරෝධායන සහ ප්‍රතිකාර කිරීමට ඉඩපහසුකම් සලසා ඇත.
මෙම අවස්ථාවට සෞඛ්‍ය අමාත්‍යාංශය නියෝජනය කරමින් වෛද්‍ය අතපත්තු, බන්ධනාගාර කොමසාරිස් ජනරාල් තුෂාර උපුල්දෙනිය, කොමසාරිස් පුනරුත්ථාපන චන්දන ඒකනායක, කොමසාරිස් බුද්ධි මෙහෙයුම් තුසිත උඩුවර, බන්ධනාගාර සෞඛ්‍ය සේවා නියෝජ්‍ය අධ්‍යක්ෂ හේමන්ත රණසිංහ, පල්ලන්සේන තරුණ වරදකරුවන්ගේ විශෝධන මධ්‍යස්ථානයේ සහකාර අධිකාරී ජීවක ඉන්ද්‍රජිත් යන මහත්වරු සමග ජාත්‍යන්තර රතුකුරුස සමාජයේ වෛද්‍ය කාර්ය මණ්ඩලයක්ද එක්විය.
(මුලාශ්‍රය – සුදර්ශණි ප්‍රනාන්දුපුල්ලේ ඇමතිවරියගේ ෆේස් බුක් පිටුවෙනි )
