ජාත්‍යන්තර හා දේශීය විරෝධතා මැද අධිකරණය හමුවට ගෙනගොස් සිටි සම්මානලාභී ලේඛකයකු නිදොස් කොට නිදහස් කිරීමට අධිකරණය කටයුතු කර තිබේ. “අර්ධ” නමින් අන්තර්ජාලයේ කෙටිකතාවක් පළකිරීමෙන් බුද්ධාගමට අපහාස කළ බවට චෝදනා නගා සිවිල් හා දේශපාලන අයිතිවාසිකම් පිළිබඳ ජාත්‍යන්තර සම්මුතිය (ICCPR) යටතේ ලේඛක ශක්තික සත්කුමාර 2019 වසරේ අප්‍රේල් 1 දින රක්ෂිත බන්ධනාගාරගත කරන ලදී. දින 130 ක කාලයක් බන්ධනාගාර ගතව සිටීමෙන් පසු ඔහුට ඇප මත නිදහස හිමි වූයේ 2019 අගෝස්තු 08 දිනයි.
ලේඛකයා අත් අඩංගුවට ගෙන තිබුනේ බෞද්ධ තොරතුරු මධ්‍යස්ථානයේ අධ්‍යක්ෂ අඟුළුගහ ජිනානන්ද භික්ෂුව විසින් පොලිස්පතිට කරන ලද පැමිණිල්ලකින් අනතුරුවය.
ඔහු අයුක්ති සහගත ලෙස අත් අඩංගුවට ගැනීම සහ රඳවා තබා ගැනීම ජාත්‍යන්තර පෙන් සංවිධානයේ අවධානයට ගෙන එමින් ඊට විරුද්ධව අන්තර් ජාතික විරෝධතාවක් දියත් කිරීමට සඳහා ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) සංවිධානය විසින් 2019 ජුනියේදී මූලික සම්බන්ධීකරණ කටයුතු සිදුකර තිබුණි.
ලේඛක සත්කුමාරට එරෙහි නඩුව පොල්ගහවෙල මහේස්ත්‍රාත් අධිකරණයේ දී 2021 පෙබරවාරි මස 9 වන අඟහරුවාදා විභාගයට ගත් අවස්ථාවේදී නීතිපතිවරයා විසින් අධිකරණය වෙත යොමු කළ වාර්තා සලකා බැලු මහෙස්ත්‍රාත් අධිකරණය ලේඛක ශක්තික සත්කුමාර නිදොස් කොට නිදහස් කර තිබේ.
“නීතිපති විසින් 2021 ජනවාරි 25 දා ඉදිරිපත් කරන ලද වාර්තාව පදනම් කොටගෙන පොල්ගහවෙල මහේස්ත්‍රාත් අධිකරණයේ නඩුවෙන් ලේඛක ශක්තික සත්කුමාර නිදහස් කරනු ලබන අතර නඩුව අවසන් කරන ලදී. කිසිදු අධිචෝදනාවක් ගොනු කෙරෙන්නේ නැත,” යි නීතිඥ සංජය විල්සන් ජයසේකර සමාජ මාධ්‍ය ඔස්සේ නිවේදනය කර තිබේ. බන්ධනාගාර ගත වන විට සංවර්ධන නිලධාරියකු ලෙස රාජ්‍ය සේවයේ කටයුතු කළ ශක්තික සත්කුමාර ඇප ලැබීමෙන් පසු නැවත රාජ්‍ය සේවයේ පිහිටුවා තිබුනේ 2019 දෙසැම්බර් 2 දිනයි.
මානව හිමිකම් රැකීම අරමුණු කොටගත් පනතක් නීතිපති දෙපාර්තමේන්තුව විසින් අහිතකර ලෙස යොදා ගතහොත් තමන්ට වසර 10 ක කාලයක් සිරගත වීමේ අවදානමක් පවතින බව පෙන්වා දෙමින් එම අනතුරින් තමන් මුදවා ගැනීම සදහා සක්‍රීයව මැදිහත් වන ලෙස පසුගිය වසරේ සැප්තැම්බර් මාසයේදී ශක්තික සත්කුමාර සිතීමේ සහ ප්‍රකාශනයේ නිදහස වෙනුවෙන් පෙනී සිටින ලක් වාසීන්ගෙන් ඉල්ලීමක්ද කර තිබුනි. තමන්ගේ නිදහස් ලේඛනයට එරෙහි ක්‍රියාමාර්ග ශක්තික සත්කුමාර විසින් කොළඹ ශ්‍රේෂ්ඨාධිකරණයේ ගොනු කරන ලද මුලික අයිතිවාසිකම් පිළිබද පෙත්සම් විභාගය 2021 මාර්තු 24 වන බදාදා පෙරවරු නමයට විභාගයට ගැනීමට නියමිතව තිබුනි.
ශක්තික ජාත්‍යන්තරයට :
2020 වසරේ මැයි මස 5 වන දින අත්තනෝමතික ලෙස රඳවා තබා ගැනීම පිළිබඳ එක්සත් ජාතීන්ගේ ක්‍රියාකාරී කණ්ඩායම (Working Group on Arbitrary Detention) එහි 87 වන සැසියේදී තම මතය ඉදිරිපත් කරමින් දීර්ඝ කරුණු විග්‍රහයක් සහිතව පෙන්වා දී තිබුණේ ලේඛක ශක්තික සත්කුමාර නඩු විභාගයට පෙර මාස 4 ක් පුරා රඳවා තබා ගැනීම හේතුවෙන් ශ්‍රී ලංකා රජය සිය ජාත්‍යන්තර මානව හිමිකම් බැඳීම්වලට පටහැනිව කටයුතු කොට ඇති බවයි.
ඇම්නස්ටි ජාත්‍යන්තරය විසින් ශක්තික සත්කුමාර හෘද සාක්ෂිය නිසා සිරගත කරන ලද්දෙක් ලෙස නම් කරන ලදී. ඇමරිකාවේ රාජ්‍ය නොවන සංවිධානයක් වන Freedom Now විසින් ගොනු කරන ලද පෙත්සමකට ප්‍රතිචාර දක්වමින් එක්සත් ජාතීන්ගේ සංවිධානයද නිගමනය කොට තිබුණේ, අදහස් ප්‍රකාශ කිරීමේ නිදහස භුක්ති විදීම හේතු කොට ශක්තික සත්කුමාර අත්තනෝමතිකව රඳවාගෙන තිබු බවයි.
theleader.lk