අප්‍රියෙල් 21 වනදා කටුවපිට්ය සෙබස්තියන් මුනිඳුන්ගේ දේවස්ථානයේ සිදුවූ මරාගෙන මැබරෙන බෝම්බ ප්‍රහාරයෙන් මියගිය අයගේ පවුල්වල සහ රෝගී බවට පත්වූ අය වෙනුවෙන් අදදින මෙම දේවස්ථානයේ ප්‍රථම දිව්‍ය පූජා යාගය පවත්වන ලදී. මේ සඳහා අගරදගුරු ගරු මැල්කම් රංජිත් හිමිපාණන් ඇතුළු පියතුමන්ලා විශාල පිරිසක් සහභාගීවිය. තම මියගිය ලබැඳීයන් අතහැරගොස් දින කිහිපයක් ගියද දුක වාවනු නොහැකි මව්වරු, පියවරු, සහෝදර සහෝදරියන් කඳුළු වැගිරූ මේ අවස්ථාව ඉතා දුක්බර දසුනක් විය. මෙසේ දුකින් පීඩාවට පත් කටුවපිටිය ජනතාවගේ තුවාල තවමත් සුව අතට හැරී නැතිබව ඔවුන්ගේ මුහුණු දෙස නෙත් යොමා බැලූ විට පැහැදිළි වෙයි. මෙම ජනතාවගේ බාහිර තුවාල වලට වඩා හිත තුවාලවී ඇති හෙයින් අගරදගුරු තුමාගේ පැමිණීම සහ මේ ගැන අදහස් දැක්වීම ඔවුන්ට ඉමහත් අස්වැසිල්ලක් වන්නට ඇත.
” මියගිය අය අපේ නෑදෑයෝ, අපි ඔබත් සමඟ ඉන්නවා ඒ නිසා අද ඔබ තනි නෑ. කටුවපිටිය කියන්නෙ අපේම කොටසක්. මේ දෙව්මැදුරු හදල තියෙන්නෙ ගඩොලින්, ඒ සියල්ලටවඩා අපිට මේ මියගිය අය වටිනවා. මේ විනාශය වෙනවිට මේ මියගිය හැම දෙනාම දිව්‍ය සත්ප්‍රසාද ලබල අවසන්, ඒනිසා ඔවුන් අද ඉන්නෙ ස්වර්ගයේ. ඒ මියගිය අය සිය ගනනක් ශාන්තුවරයො බවට පත්වෙලයි ඉන්නෙ. අද ඔවුන් අපට මග පෙන්වනව, ” යනුවෙන් පැවසූ එතුමා ජීවිත සිය ගනනක් බිළිගත් අය ගැනත් පළකළේ මෙවන් අදහසකි.
ආගම තියෙන්නෙ ජීවිතය සැපවත් කරන්න,, ජීවිතයට අර්ථයක් දෙන්න, ඒනිසා ලේ හලන අයට අපි මොර ගසා කියන්නෙ දැන් ඇති. දෙවියන් වහන්සේ දුන් ආදර්ශය අනුව අපි කටයුතු කළ යුතුයි. මේ අවස්ථාවෙ නොමඟ ගිය පිරිසට අපි වෛර කරන්නෙ නෑ . නමුත් ඔබව දෙවියන්ගේ උසාවියට යොමු කරන්නට අපට සිදුවෙනවා. ඒ අනුව දෙවියන් සමඟ ගනන් බේරගන්න ඔබට සිදුවෙනවා.
මෙම දිව්‍ය පූජාව අවසානයේදී ව්‍යසනයට පත්වූ අයගේ පවුල්වලට මුදල් පරිත්‍යාගයක් කිරීමක්ද අගරදගුරුතුමා අතින් සිදුවිය.