කලක සිට නැවති තිබුණ බෝට්ටු මගින් ඔස්ට්‍රේලියාවට යෑම දැන් යළිත් ඇරඹි තිබේ. පසුගිය 11 වෙනිදා වාලච්චේන ප්‍රදේශයෙන් මෙම ගමන ඇරඹි තිබුණ අතර 41 දෙනෙකුගෙන් යුත් මේ පිරිසව ගුවන් මගින් යළිත් ලංකාවට එවිමට ඕ්ස්ට්‍රේලියානු බලධාරින් පියවර ගෙන තිබුණි.
මේ අතර ඕස්ට්‍රේලියානු රජය විසින් එරට රාජකීය ගුවන් හමුදාවට අයත්ව තිබූ බීච්ක්‍රාෆ්ට් KA350 King Air ගුවන් යානයක් (ලියාපදිංචිය A32-673) ශ්‍රී ලංකා රජයට තිළිණ කරන බව දැනුම් දී තිබේ.
මෙම ගුවන් යානය පිරිනැමීමට අදාළව ඕස්ට්‍රේලියානු ස්වදේශ කටයුතු අමාත්‍ය ක්ලෙයාර් ඕ’නෙයිල් (Clare O’ Neil) මහත්මිය විසින් ලබාදුන් ලිපිය ශ්‍රී ලංකාවේ ඕස්ට්‍රේලියානු මහ කොමසාරිස් පෝල් ස්ටෙෆන් මහතා විසින් පසුගියදා ජනාධිපති කාර්යාලයේ දී ජනාධිපති රනිල් වික්‍රමසිංහ මහතා වෙත නිල වශයෙන් භාර දෙනු ලැබීය.
බීච්ක්‍රාෆ්ට් KA350 King Air යනු නවීන ද්විත්ව එන්ජින් සහිත turboprop ගුවන් යානයකි.
මෙම ත්‍යාගය ශ්‍රි ලංකාවට සිය සමුද්‍රීය ආරක්ෂාව ශක්තිමත් කර ගැනීමේ හැකියාව වැඩිදියුණු කරනු ඇති බව එම ලිපියෙහි සඳහන් වෙයි.
එය ජාත්‍යන්තර අපරාධ මැඩලීමේ දී දෙරට අතර සමීප සහයෝගිතාව තහවුරු කරන්නක් බවත්, මුහුදු මාර්ග ඔස්සේ සිදු කරන මිනිස් ජාවාරම මැඩලීමේ ක්‍රියාවලිය සඳහා ද මෙමගින් පුළුල් දායකත්වයක් ලබාගත හැකි වනු ඇති බවත් ලිපියෙහි සඳහන්ය.
සමුද්‍රීය අපරාධ මැඩලීමේ දී ශ්‍රි ලංකාව ලබාදෙන සහාය ඕස්ට්‍රේලියානු රජය බෙහෙවින් අගය කරන අතර මිනිස් ජාවාරම සැලකිය යුතු ප්‍රමාණයකින් මැඩලීමට මෙන්ම සාපරාධී මංකොල්ලකෑම්වලින් සහ භයානක මුහුදු ගමන් නිසා අවදානමට ලක්විය හැකි මිනිස් ජීවිත ආරක්ෂා කීරිමට දෙරට අතර මෙම සහයෝගිතා වැඩපිළිවෙළ හේතු වී තිබෙන බවත් ලිපියෙහි වැඩිදුරටත් සඳහන් වේ.
අදාළ ගුවන් මෙහෙයුම් පිළිබඳ ඕස්ට්‍රේලියානු රජය මාස 12 ක කාලයක් ශ්‍රී ලංකාවට සහාය ලබා දෙනු ඇති අතර ඉන් අනතුරුව එහි වගකීම ශ්‍රී ලංකා රජය සතු වේ.
ඕස්ට්‍රේලියානු නියෝජ්‍ය මහ කොමසාරිස් ලලිතා කපූර් මහත්මිය, පළමු ලේකම් බ්‍රෙට් සෙහන්ඩර් මහතා සහ ආරක්ෂක උපදේශක කපිතාන් ඉයන් කේන් යන මහත්වරුන් ද මෙම අවස්ථාවට සහභාගී වූහ.
මුලාශ්‍රය .news.lk