මීගමුව -මංකුලිය ශාන්ත අන්තෝනි පාසැල 2016 ඩෙංගු වලින් තොර හොඳම පාසැල ලෙස සම්මාන දිනාගෙන තිබින. මෙහිදී සිසුදරුවන් ,ගුරුවරුන්, දෙමාපියන් කරන ලද කැපවීමේ ප්‍රතිපලයක් ලෙස පාසැලට හොඳ නාමය ලැබින. නමුත් අදවනවිට මීගමු කලාපයේ අවම පහසුකම්වත් නැති පාසැල ලෙසද නාමකරණයට පාත්‍රවී ඇත.
සිසුදරුවන් 160 ක් පමණ අධ්‍යාපනය ලබන මෙහි විශේෂ දරුවන්ගේ ඒකකයක්ද ඇත. මෙම ඒකකය දරුවන් 15 වකින් පමණ සමන්විත වුවද අදවනවිට එහි සංඛ්‍යාව 7ක් දක්වා අඩුකරගැනීමට හැකිවී ඇත. ඒ ගුරුවරයාගේ හැකියාව මත මෙම දරුවන්ගෙන් සමහර අය වෙනත් පංති වලට අන්තර්කරණය කර ගැනීමට හැකිවීම නිසයි. මේ අනුව මෙම පාසැල හොඳ වීමට මෙයද එක් හේතුවක් ලෙස අපි දකිමු.
තත්වය මෙසේ වුවද පාසැලට විදුහල්පති වරයෙක් නැත. තුන වසරේ උගන්වන ගුරුතුමිය විදුහල්පතිගේ භූමිකාවටද උරදෙයි. ඇය දක්ෂ නිහතමානී ගුරුතුමියක් බව අපි දනිමු. නමුත් මේ කාර්්‍යන් දෙකක් බව වගකිවයුතු අය දැනගත යුතුය. එසේම මෙම පාසැලට එන ගුරුභවතුන් වැඩිපිරිස දුර පළාත්වලින් පැමිණි අයයි. මේනිසා මොවුන් ඕනෑම මොහොතක විදුහලට අහිමිව යෑමේ අවධානමක්ද ඇත.මේ සියළු කරුණු සළකා බලනවිට පැහැදිළි වන්නේ මීගමු අධ්‍යාපන කළාපයේ ගුරුමාරු ඇතුළු අනෙකුත් ගැටළු රාශියකින් පාසැලේ දරුවන් සහ දෙමව්පියන් පීඩාවට ලක්වන බවයි. මේ අනුව අපගේ ඉල්ලීම වන්නේ අධ්‍යාපන අධ්‍යක්ෂ තුමා ඇතුළු වගකිවයුතු අය මැදිහත් වී මෙම පාසැලේ හොඳ නම රැක ගන්නවා මෙන්ම අනෙකුත් අවශ්‍යතාද ඉටුකරදීමයි.
ජීවා උමයංගනී – මංකුලිය