ඉන්ද්‍රඛීලයක් සේ නොසැලී
සිටියෙහිය ඔබ
දකුණු ලක ජාතිවාදී බලවතුන්ගේ හා
ඉන්දීය අධිරජවාදීන්ගේ හා
ගෝලීය ධන වැද්දන්ගේ
රැවිලි ගෙරවිලි හමුවේ
උතුරේ දෙමළාගේ
නැගෙනහිර මුසල්මානුවාගේ
වතුකරයේ වතු දෙමළාගේ
යටපත් කර තිබෙන
අභිමන ඔසවාලන්නට
පෙරට තැබූ අඩිය
දශමයකින්වත්
නොහරවා ආපස්සට
ඔබ සමඟ එක පෙළට
සිට ගත්ත උන් නොයෙක් වර
දුවන විට මංමුලාවී
බලයටම යටවී
මිනිසත් බව මකාගෙන
ජාතිවාදී මඩ ගොහොරුවටම
රතු නෙළුමක්ය ඔබ
ඉන් උඩට මතුවන
අවසන
උත්පාද පිඨිභංග
නියරටම එකඟව
අපෙන් සමුගන්නා තුරුම
ඇත්තෙන්ම ඔබ
බාහුමය වික්‍රම විකුම් පෑ . ….
ස.බ.වෙල්ගම
