රාජ්‍ය සේවයේ නිලතල සඳහා ත්‍රිවිධ හමුදා සෙබළුන් යෙදවීමේ ආණ්ඩුවේ ප්‍රතිපත්තිය හමුදාකරණයකට මග පාදන බවට අධ්‍යාපන ක්ෂේත්‍රයේ වෘත්තීය සමිති අනතුරු අඟවයි. සිවිල් රාජකාරි සඳහා යුද සෙබළුන් පත් කිරීමෙන් රට මිලිටරිකරණය වීම නොවැලැක්විය හැකි බව පෙන්වා දෙන දිවයිනේ ප්‍රමුඛතම ගුරු සංගමයක්, පත්වීම් නොලද ගුරුවර, ගුරුවරියන් දහස් ගණනක් සිටියදී ගුවන් හමුදා භටයන් ඉගැන්වීමට යෙදවීමේ තීරණය වහා නතර කරන ලෙස රජයට බල කර සිටී.
නිවේදනයක් නිකුත් කරමින් ලංකා ගුරු සංගමය පෙන්වා දෙන්නේ මේ වන විට කැබිතිගොල්ලෑව හා වව්නියාව වැනි දුෂ්කර ප්‍රදේශවල පාසල්වලට ගුවන් හමුදා සාමාජිකයන් ගුරුවරු ලෙස පත් කිරීමට රජය තීරණය කර ඇත්තේ දහස් සංඛ්‍යාත පුහුණු ගුරුවරුන් සමූහයක් පත්වීම් ලබා නොතිබියදී බවයි.
ලංකා ගුරු සංගමයේ ප්‍රධාන ලේකම් ජෝසප් ස්ටාලින් පෙන්වා දෙන්නේ එය රට හමුදාකරණය කිරීමේ ක්‍රියාවලියේ තවත් දිගුවක් ලෙසිනි.
කැබිතිගොල්ලෑව හා වව්නියාව වැනි දුෂ්කර ප්‍රදේශවල පාසල්වලට ගුවන් හමුදා සාමාජිකයන් ගුරුවරු ලෙස පත් කිරීමට රජය තීරණය කර ඇත්තේ දහස් සංඛ්‍යාත පුහුණු ගුරුවරුන් සමූහයක් පත්වීම් ලබා නොතිබියදී බව පවසන ලංකා ගුරු සංගමයේ ප්‍රධාන ලේකම් ජෝසප් ස්ටාලින් පෙන්වා දෙන්නේ එය රට හමුදාකරණය කිරීමේ ක්‍රියාවලියේ තවත් දිගුවක් ලෙසිනි.
“මෙය වර්තමාන රජය අමාත්‍යාංශ ලේකම් තනතුරුවලට, විවිධ රාජ්‍ය ආයතන වල ප්‍රධානීන් ලෙස හා කෝවිඩ් මර්දනය සඳහාදිස්ත්‍රීක් 25 ට හමුදා නිලධාරීන් පත් කිරීමේ ක්‍රියාවලියේ දිගුවක් ලෙස පෙන්වා දෙමු. සිවිල් පුද්ගලයන්ගේ රාජකාරි සඳහා හමුදා සාමාජිකයන් පත් කිරීම තුළ රට මිලිටරිකරණයක් වීම නොවැලැක්විය හැක.” ගුරු සේවයේ නිලධාරීන් පත් කිරීම වෙනුවෙන් ශ්‍රී ලංකා ගුරු සේවා ව්‍යවස්ථාවක් සහ බඳවා ගැනීම් පටිපාටියක් තිබියදී මේ ආකාරයෙන් හමුදා සාමාජිකයන් පත් කිරීම පිළිගත නොහැකි තත්වයක් බවයි ජ්‍යෙෂ්ඨ ගුරු සංගම් නායකයා පෙන්වා දෙන්නේ.
ගුරු හිඟය පවතින පාසල්වල ඉංග්‍රීසි හා තොරතුරු තාක්ෂණ වැනි විෂයයන් ඉගැන්වීම සඳහා ගුවන් හමුදා සාමාජිකයන් යෙදවීමට හැකි බවට ගුවන් හමුදාපති එයාර් මාෂල් සුදර්ශන පතිරණ කළ යෝජනාවට අධ්‍යාපන අමාත්‍යාංශය එකඟතාව පළ කර තිබුනි.
”ගුරු හිඟය පවතින පාසල්වල ඉංග්‍රීසි හා තොරතුරු තාක්ෂණ වැනි විෂයයන් ඉගැන්වීම සඳහා ගුවන් හමුදා
සාමාජිකයන් යෙදවීමට හැකි බවට ගුවන් හමුදාපති එයාර් මාෂල් සුදර්ශන පතිරණ කළ යෝජනාවට අධ්‍යාපන අමාත්‍යාංශය එකඟතාව පළ කර තිබුනි.”
ජනමාධ්‍ය විසින් වාර්තා කර තිබු පරිදි වාර්තා කර තිබුනේ ප්‍රථමයෙන්ම වව්නියාව ආශ්‍රිත දුෂ්කර පාසල් දරුවන්ට ඉහත විෂයයන් ඉගැන්වීම සඳහා ගුවන් හමුදාව යෙදවීමට නියමිත බවයි. සෙසු ප්‍රදේශවල දුෂ්කර පාසල් සඳහා ද ගුවන් හමුදා සාමාජිකයන් යොදවා දරුවන්ට ඉගැන්වීම කෙරෙහි ද අවධානය යොමු කර තිබෙන බව අධ්‍යාපන අමාත්‍යාංශ ලේකම් මහාචාර්ය කපිල පෙරේරා පැවසු බව එම වාර්තාවල සදහන්ව තිබුනි.
ජනවාරි 3 ඉරිදා ලංකා ගුරු සංගමය නිකුත් කළ මාධ්‍ය නිවේදනය මගින් පෙන්වා දී ඇත්තේ වර්තමානයේ ගුරු සිසු අනුපාතය 20:1 ක් ලෙස පැවතියදී අධ්‍යාපන අමාත්‍යාංශය විධිමත් ගුරු තුලනයක් නොකිරීම තුළ දුෂ්කර ප්‍රදේශවල ගුරු පුරප්පාඩු ඇති වී තිබෙන බවයි. එසේම ගුරුවරු ස්ථාන ගත කිරීම සඳහා විධිමත් ප්‍රතිපත්තියක් නොමැති වීම ද දුෂ්කර ප්‍රදේශවල ගුරු හිඟයක් ඇතිවීමට හේතු ලෙස ගුරු සංගම් නායක ජෝසප් ස්ටාලින් පෙන්වා දෙයි. ඔහු පවසන පරිදි 2020 ජනවාරි වන විට පත්වීම් ලබාදිය යුතු වූ ජාතික අධ්‍යාපන විද්‍යාපීඨ 19 ක ගුරුවරුන් 3772 කට වසරක් තිස්සේ පත්වීම් ලබාදීමට අධ්‍යාපන අමාත්‍යාංශය අපොහොසත් වී ඇත.
එසේ ගුරුවරු ලෙස පුහුණු කරන ලද පිරිසක් සිටියදී ඔවුන් අදාළ පුරප්පාඩු සඳහා පත් නොකර පවතින ගුරු පුරප්පාඩු සඳහා හමුදා සාමාජිකයන් පත් කිරීම ගැටලූකාරී තත්වයක් බවයි ලංකා ගුරු සංගමය පවසන්නේ.
”2020 ජනවාරි වන විට පත්වීම් ලබාදිය යුතු වූ ජාතික අධ්‍යාපන විද්‍යාපීඨ 19 ක ගුරුවරුන් 3772 කට වසරක් තිස්සේ පත්වීම් ලබාදීමට අධ්‍යාපන අමාත්‍යාංශය අපොහොසත් වී ඇත. එසේ ගුරුවරු ලෙස පුහුණු කරන ලද පිරිසක් සිටියදී ඔවුන් අදාළ පුරප්පාඩු සඳහා පත් නොකර පවතින ගුරු පුරප්පාඩු සඳහා හමුදා සාමාජිකයන් පත් කිරීම ගැටලූකාරී තත්වයක් බවයි ලංකා ගුරු සංගමය පවසන්නේ.”
දෙපාර්තමේන්තු අකාර්යක්ෂමතාව එසේම වසර ගණනක් තිස්සේ කැබිතිගොල්ලෑව අධ්‍යාපන කලාපයේ පාසල්වල සිවිල් ආරක්ෂක දෙපාර්තමේන්තුවෙන් වැටුප් ලබන 80 කට ආසන්න පිරිසක් ගුරුවරු ලෙස කටයුතු කරන බව පෙන්වා දෙන ලංකා ගුරු සංගමය අවධාරණය කරන්නේ මෙම පුරප්පාඩු හඳුනාගෙන එම පුරප්පාඩුවලට ස්ථිර ගුරුවරු පත් නොකිරීම අධ්‍යාපන අමාත්‍යාංශයේ අකාර්යක්ෂමතාවය මත සිදු වී ඇති බවයි.
පසුගිය වසරවල ද විද්‍යාපීඨ පත්වීම්ධාරීන් ප්‍රධාන පෙළේ ජාතික පාසල්වලට අතිරික්ත වන පරිදි පත්කර තිබූ අතර, දුෂ්කර ප්‍රදේශ සම්බන්ධයෙන් කිසිදු අවධානයක් යොමු කර නොතිබුන බවට චෝදනා කරන ලංකා ගුරු සංගමය මේ තත්වය තුළ ගුරු පුහුණුව ලද පත්වීම් නොලද ගුරුවරු සිටියදී හමුදා සාමාජිකයන් ගුරුවරු ලෙස පත් කිරීම වෙනත් අරමුණකින් සිදුවන්නේ ද යන සැකයත් මතුකර තිබේ.
දුෂ්කර ප්‍රදේශවල පවතින ගුරු පුරප්පාඩු සඳහා විධිමත් පුහුණුව ලද ගුරුවරු පත් නොකර ස්වේච්ඡා ගුරුවරු, හමුදා සාමාජිකයන් ඇතුළු විවිධ කොටස් පත් කිරීම තුළ එම ප්‍රදේශවල සිසුන්ට පුහුණු ගුරුවරයෙකුගෙන් අධ්‍යාපන ලැබීමේ අයිතියද අහිමි කොට ඇති බවටත් ගුරු සංගම් නායක ජෝසප් ස්ටාලින් චෝදනා කරයි. මේ තත්වය තුළ කැබිතිගොල්ලෑව, වව්නියාව ඇතුළු දුෂ්කර ප්‍රදේශවල පවතින ගුරු පුරප්පාඩු සඳහා ගුවන් හමුදා සාමාජිකයන් පත් කිරීමේ තීරණය නතර කර එම පුරප්පාඩු සඳහා පුහුණු ගුරුවරු විධිමත්ව පත් කරන ලෙස ලංකා ගුරු සංගමය රජයෙන් ඉල්ලා සිටී.
ජනපති කැබිතිගොල්ලෑවට:
“ගම සමග පිළිසඳර” ට – ජනපති කැබිතිගොල්ලෑවට යයි ගුවන් හමුදා භටයන් පාසල්වලට යෙදවීමේ ආණ්ඩුව තීරණය ප්‍රකාශයට පත් වුනේ ජනාධිපති, ගුවන් හමුදාපති හා අධ්‍යාපන අමාත්‍යංශ ලේකම් ඇතුළු බලධාරීන් කැබිතිගොල්ලෑවේ පැවැත්වූ රාජ්‍ය සභාවකින් අනතුරුවය. “ගම සමග පිළිසඳර” වැඩ සටහනට එක්වෙමින් ජනාධිපති ගෝඨාභය රාජපක්ෂ 2020 දෙසැම්බර් 30 දා අනුරාධපුර නගරයේ සිට කිලෝ මීටර 73ක් දුරින් පිහිටි කැබිතිගොල්ලෑව ප්‍රදේශීය ලේකම් බල ප්‍රදේශයේ කණුගහවැව ගම්මානයට ගොස් තිබුනි. ගමේ පන්සලේ විහාරාධිපති හිමියන්, ග්‍රාම නිලධාරී, ප්‍රාදේශීය ලේකම් සහ ප්‍රාදේශීය සභාවේ සභාපති එක්ව ගම්මානයේ අවශ්‍යතා හඳුනාගෙන ගුවන් හමුදාපතිවරයාට සැලසුම් ඉදිරිපත් කරන්නැයි ජනාධිපතිතුමා එදින උපදෙස් දුන් බව ජනාධිපති මාධ්‍ය ඒකකය වාර්තා කර තිබේ. එහි වැඩි දුරටත් දැක්වෙන්නේ ගුවන් හමුදාවේ 70 වන සංවත්සරය නිමිත්තෙන් කණුගහවැව ග්‍රාමයේ නිවාස ඇතුළු අවශ්‍යතා සංවර්ධනය ගුවන් හමුදාපති එයාර් මාර්ෂල් සුදර්ශන පතිරණ විසින් භාරගත් බවයි.
theleader.lk