කල්කුඩා ප්‍රදේශයේ ඉදිකරමින් තිබෙන මෙන්ඩිස් අරක්කු ව්‍යාපාරයට අයත් අලුත් ගොඩනැගිල්ලක් සම්බන්ධයෙන් තොරතුරු සොයා බැලීමට ගිය නැගෙනහිර මාධ්‍යවේදීන් දෙදෙනෙකුට එම ස්ථානයේ සිටි පුද්ගලයන් විසින් පහරදීමක් සිදුකර ඔවුන් පසුපස හඹාවිත් ඇති බව වාර්තා වේ. මේ වන විට මෙම මාධ්‍යවේදීන් එරාවුර් පොලිස් ස්ථානයට ගොස් සිදුවීම සම්බන්ධයෙන් පැමිනිලි කර ඇති අතර ඔවුන් මේ වනවිට එම ස්ථානයේ රැදී සිටිති. මෙම සිදුවීමට මුහුණදුන් සසිකරන් පුන්‍යමූර්ති හා එන්.නිත්‍යනාදන් යන දෙදෙනා වීරකේසරී,තිනකුරල් යන මාධ්‍ය ආයතන වල සේවය කරන මාධ්‍යවේදීන් දෙදෙනෙකි.
කල්කුඩා ප්‍රදේශයේ මෙන්ඩිස් අරක්කු ව්‍යාපාරයට අයත් ශාඛාවක් ඉදිකිරීමට ආරම්භවීමත් සමගම මේ සම්බන්ධයෙන් ජනතාවගේ විරෝධයක් මතුවී ඇති අතර අදාළ ආයතන කීපයකින් මෙම ඉදිකිරීම තහනම් කර තිබේ. එසේ තහනම් කර තිබියදීත් හොරෙන් නැවතත් මෙම ස්ථානය ඉදිකිරීම් සිදුවෙමින් පැවති අතර මේ සම්බන්ධයෙන් සොයා බැලීමට මෙම මාධ්‍යවේදීන් දෙදෙනා එම ස්ථානයට ගොස් ඇත. එම මාධ්‍යවේදීන් පවසන්නේ ඔවුන් යතුරු පැදියකින් එම ස්ථානයට ගිය බවත් ඔවුන් දුටු විගස සේවය කරමින් සිටි පුද්ගලයින් ගල් හා වයර් වැනි දෙයකින් පහරදී කිලෝමීටර් 3ක් පමණ පිටුපසින් එළවාගෙන පැමිණි බවයි. හැකි ඉක්මණින් තමන් එම ස්ථානයෙන් පිටවී පලා ආ අතර මග දිගටම පිරිසක් තමන් පසුපස එළවාගෙන පැමිණි බව ඔවුන් පවසයි.
