ආචාර්ය දීපිකා උඩුගම,
සභාපති,
ශ්‍රී ලංකාව මානව හිමිකම් කොමිසම,
14, ආර්.ඒ. ඩි මෙල් මාවත,
කොළඹ -04
රම්සි රාසීක් කොන්දේසි විරහිතව මුදා හැරීම: ශ්‍රී ලංකාවේ ජනතාවගේ සිවිල් හා දේශපාලන අයිතිවාසිකම් ආරක්ෂා කිරීම
සටහන: මෙම විවෘත ලිපිය ශ්‍රී ලංකාවේ මානව හිමිකම් කොමිසමට (HRCSL) කරන ලද නිල පැමිණිල්ලකට පසු විපරමකි.
සිවිල් හා දේශපාලන අයිතිවාසිකම් පිළිබඳ ජාත්‍යන්තර සම්මුතිය (ICCPR) සහ සයිබර් අපරාධ නීති උල්ලංඝණය කිරීම සම්බන්ධයෙන් විශ්‍රාමික රජයේ නිලධාරියෙකු වන රම්සි රාසීක් අප්‍රේල් 09 වන දින අත්අඩංගුවට ගනු ලැබීය. රාසීක්ට ශ්‍රී ලංකාවේ මුස්ලිම් මූලධර්මවාදය සහ වර්ගවාදය විවේචනය කිරීමේ ඉතිහාසයක් ඇත. ඔහු අත්අඩංගුවට ගත් අප්‍රේල් 02 වන දින ඔහු මුහුණු පොතේ, ශ්‍රී ලාංකික මුස්ලිම්වරුන් ප්‍රජාවක් ලෙස පීඩාවට පත්කරන සියලු ආකාරයේ මූලධර්ම හා වර්ගවාදයට එරෙහිව ‘ජිහාඩ්’ (චින්තනයක්) ඉල්ලා සිටියේය. ඔහු බුද්ධිමය අරගලයක් යෝජනා කරන බව රාසීක් සිය ලිපියේ විශේෂයෙන් සඳහන් කරන්නේ, ප්‍රගතිශීලී මුස්ලිම්වරුන්ට පිටතින් මෙන්ම මුස්ලිම් ප්‍රජාව තුළ ඇති ප්‍රහාරයන් ප්‍රශ්න කිරීමට හා ඒවාට එරෙහිව සටන් කිරීමට ද අවශ්‍ය බව පවසමිනි.
දින දෙකකට පසු, ඔහු ඒ පළ කළ ලිපිය හේතුවෙන් තමාට මරණ තර්ජන විශාල ප්‍රමාණයක් එල්ල වී ඇති බවත්, බොහෝ දෙනෙක් ඔහුගේ වචන වැරදියට වටහාගෙන ඇති බවත්, ජාතිවාදී අදහස් ප්‍රචාරය කිරීම නිසා ඔහුව සිරගත කරන ලෙස ඉල්ලා සිටින බවත් කියා සිටියේය. මුහුණු පොතේ ඔහු වෙත එන පණිවුඩ පිළීබඳ ඔහුගේ කුඩා දරුවන් ද බිය වූ අතර ඔවුන් ආරක්ෂා කිරීම සඳහා ඔහු ස්වයං වාරණය කිරීමට තීරණය කර තිබුණි. කෙසේ වෙතත්, විවිධ අනන්‍යතා සහ අදහස් ඇති අය කෙරෙහි නොඉවසීම ඇති කිරීම සම්බන්ධයෙන් ඔහුට ICCPR යටතේ චෝදනා එල්ල විය.
මේ වන විට පැහැදිලි සාක්ෂි ඉදිරිපත් නොකර ඔහු ව දින 60 කට වැඩි කාලයක් රඳවාගෙන සිටී. මේ වන විටත් බිඳ වැටී ඇති ඔහුගේ සෞඛ්‍ය තත්ත්වය විශාල අවදානමකට ලක් කරමින් ඔහුට අවශ්‍ය වෛද්‍ය ප්‍රතිකාර නවතා තිබේ. ඔහුට වෛද්‍ය ප්‍රතිකාර ලබා ගැනීමට අවසර දෙන ලෙස මහේස්ත්‍රාත්වරයා කළ නියෝග නොතකා විශ්වාසදායක ආරංචි මාර්ග සඳහන් කරන්නේ ඔහුට දැඩි අවශ්‍යතාවයක් ඇති විශේෂිත ඖෂධ ලබා ගැනීමට නොහැකි වීම හේතුවෙන් ඔහුගේ සෞඛ්‍ය තත්වය පිරිහී ඇති බවයි. COVID-19 වෛරසය හේතු ලෙස දක්වමින් මේ සතියේ රාසීක් හමුවීමට යාමට උත්සාහ කළ නීතිඥයෙකුට කොළඹ රිමාන්ඩ් බන්ධනාගාරයට ඇතුළුවීමට ඉඩ නොදුනි. රට යථා තත්ත්වයට පත්වීමට රජය ඉඩ දී තිබියදීත්, නීතිඥයින්ගෙන් උපදෙස් ලබා ගැනීම සඳහා සිරකරුවන්ට ඇති මූලික අයිතිවාසිකමක් අසාධාරණ ලෙස ප්‍රතික්ෂේප කිරීමට බලධාරීන් තීරණය කර ඇත.
ICCPR පනත යටතේ රාජ්‍ය බලධාරීන් විසින් පීඩාවට පත්කරනු ලැබූ පළමු පුද්ගලයා රාසීක් නොවේ. 2019 අප්‍රේල් මාසයේ සිට මෙම පනතේ 3 වන වගන්තිය යටතේ අත්අඩංගුවට ගැනීම් කිහිපයක්ම සිදුවිය.
මෙම අත්අඩංගුවට ගැනීම සිදු කරනු ලැබුවේ රාසීක් වැනි පුද්ගලයින් සහ අනෙකුත් පුරවැසියන් ඔවුන්ගේ මූලික නිදහසේ කතා කිරීමේ හා අදහස් ප්‍රකාශ කිරීමේ අයිතිය ආරක්ෂා කර ගැනීම සඳහා පනවන ලද ICCPR සහ සයිබර් අපරාධ නීති සම්පාදනය යටතේ ය. ප්‍රචණ්ඩත්වය උසිගන්වන අයට වගවීම සඳහා පනවන ලද ICCPR පනත මෑත සිට රජය විසින් ප්‍රතිපත්ති විවේචනය කරන අයට එරෙහිව භාවිත කරයි.
සයිබර් අපරාධ පනත යටතේ, ‘ජාතික ආරක්ෂාවට’, ජාතික ආර්ථිකයට හෝ මහජන පිළිවෙලට අනතුරක් හෝ ආසන්න අනතුරක් සිදුවිය හැකි ඕනෑම කාර්යයක් කිරීමට පරිගණකයක් භාවිත කරන අයට දඬුවම් කරයි. රාසික් මුහුණු පොතේ පළ කළ ලිපිය, වර්ගවාදය සහ මූලධර්මවාදය විවේචනය කිරීම, මේ සම්බන්ධයෙන් වරදක් ලෙස සැලකිය හැක්කේ කෙසේ ද යන්න පැහැදිලි නැත. නැතොත් රාසීක් පැවසු පරිදි ඔහුට මරණ තර්ජනය කළ අය විසින් එය හිතාමතාම වැරදියට වටහාගෙන ඇත.
ජනවාර්ගික හා ආගමික සුළුතර ප්‍රජාවන්ට එරෙහිව සාවද්‍ය තොරතුරු ප්‍රචාරය කිරීම, ජනවාර්ගික හා ආගමික වෛරය සහ ප්‍රචණ්ඩත්වය උසිගැන්වීම සහ සයිබර් හිරිහැරවල යෙදෙන අය, දඬුවම් නොලබන අතර ඔවුන් දේශපාලන අනුග්‍රහය අඛණ්ඩව භුක්ති විඳියි. මේ අතර, මෙම ප්‍රචණ්ඩත්වය විවේචනය කරන අයට ඔවුන්ගේ වචන නිසා පීඩා කරනු ලැබේ. පුරවැසියන්ගේ සිවිල් හා දේශපාලන අයිතිවාසිකම් පුළුල් කිරීම සඳහා මෙම ගිවිසුම උපයෝගී කර ගැනීම වෙනුවට, නීතිය හා සාමය පවත්වාගෙන යාමේ වගකීම දරන බලධාරීන්, අපේ සමාජයේ පැතිරී ඇති සිංහල-බෞද්ධ අන්තවාදයට එරෙහි ඕනෑම මතභේදයක් දුරු කිරීම සඳහා එය අනිසි ලෙස භාවිත කරයි. 2018 මුස්ලිම් විරෝධී කෝලාහලවලදී ශ්‍රී ලංකාවේ මුස්ලිම්වරුන්ට එරෙහි වෛරී කථා මැඩපැවැත්වීමට අපොහොසත් වීම සම්බන්ධයෙන් ෆේස්බුක් විසින් කරන ලද සමාව සැලකිල්ලට ගනිමින්, ශ්‍රී ලංකාවේ නීතිය ක්‍රියාත්මක කරන බලධාරීන්ට සයිබර් අවකාශය ජනවාර්ගික හා ආගමික සුළු ජාතීන් සඳහා ආරක්ෂිත ස්ථානයක් බව සහතික කිරීමට නොහැකි වීම පිළිබඳ නැවත සලකා බැලිය යුතුය..
ICCPR පනතෙහි නෛතික පැහැදිලිකම සහ වෙනස් කොට සැලකීම සහ අත්අඩංගුවට ගැනීමක් සඳහා අවශ්‍ය වන බරපතලකම ඇතුළු නීතියේ විෂය පථය පැහැදිලි කිරීම සම්බන්ධයෙන් ශ්‍රී ලංකා මානව හිමිකම් කවුන්සිලය 2019 සැප්තැම්බර් මාසයේදී ශ්‍රී ලංකා පොලිසියට ලිපියක් නිකුත් කළේය. වචන සහ ප්‍රකාශන සම්බන්ධයෙන් නීතිය ක්‍රියාත්මක කළ යුත්තේ කෙසේද යන්න හඳුනා ගැනීම සඳහා පැහැදිලි නීතිමය පරීක්ෂණ ඇති බවත්, අධිකරණයට එම පියවර සමානුපාතිකව හා අවශ්‍යතාවට අනුකූල බවත්, එම වචනවලින් වේදනාවක් ඇති වුවත් ඒවා මූලික අයිතිවාසිකම් උල්ලංඝණය නොකරන බවත් සහතික කළ හැකි බවත් එම ලිපියේ දැඩි ලෙස සඳහන් කර ඇත.
විමුක්ති ව්‍යාපාරයේ සාමාජිකයන් වන අපි, ශ්‍රී ලංකා ආණ්ඩුක්‍රම ව්‍යවස්ථාවේ 14 (1) (අ) වගන්තිය යටතේ සහතික කර ඇති, කතා කිරීමේ, ප්‍රකාශනයේ සහ ප්‍රකාශනයේ නිදහස සඳහා රම්සි රාසීක්ගේ මූලික අයිතිවාසිකම් ආරක්ෂා කරන ලෙසත්, ඔහු නිදොස් කොට නිදහස් කරන ලෙසත් රජයේ බලධාරීන්ගෙන් ඉල්ලා සිටිමු. තවද, සුළු ජාතීන්ට හානිකර ලෙස නොව, නීතිමය රාමු ධනාත්මකව ක්‍රියාත්මක කරන ලෙස අපි ඉල්ලා සිටිමු.
විමුක්ති ව්‍යාපාරය
(ගිතිකා ධර්මසිංහගේ ෆේස්බුක් පිටුවෙනි )
