ත්‍රස්ත නීති දිගටම පවත්වාගෙන යාමට නිර්දේශ කරන කොමිෂන් වාර්තාවක් භාරගත් ජනාධිපතිවරයා වගවීම සහ සංහිඳියාව වෙනුවෙන් අනාගතයේදී එක්සත් ජාතීන්ගේ සංවිධානය සමග කටයුතු කිරීමට ඇති සූදානම ප්‍රකාශයට පත් කර තිබේ. ශ්‍රී ලංකාවේ මානව හිමිකම් උල්ලංඝන සම්බන්ධයෙන් විභාග කිරීම සඳහා අතීතයේ පත් කරන ලද ජනාධිපති කොමිසන් විසින් දෙන ලද නිර්දේශ කියවා බලා වර්තමාන ජනාධිපති වරයාට නිර්දේශ ඉදිරිපත් කිරීම සඳහා පත් කරන ලද කොමිසම විසින් ජුලි 20දා ජනාධිපති ලේකම් කාර්යාලයේදී බාර දෙන ලද අතුරු වාර්තාවේ තීරණය වී ඇත්තේ ත්‍රස්තවාදය වැළක්වීමේ පනත අහෝසි නොකළ යුතු බවයි.
“ත්‍රස්තවාදය වැළැක්වීමේ පනත අහෝසි කළ යුතු යන මතවාදයට එකඟ නො වන කොමිසම් සභාව, මහා බ්‍රිතාන්‍ය ඇතුළු සෙසු රටවල ත්‍රස්තවාදය වැළැක්වීම සඳහා හඳුන්වා දී ඇති නීති අධ්‍යයනය කර පනත සංශෝධනය කළ යුතු බව අතුරු වාර්තාව මඟින් පෙන්වා දෙයි,” යනුවෙන් ජනාධිපති මාධ්‍ය ඒකකය නිකුත් කළ නිවේදනයක සඳහන් වෙයි.
රාජ්‍යය විසින් අපරාධ කරන ලද බවට නැගෙන චෝදනා දිගටම බැහැර කරමින් යුද අපරාධ ඇතුළු මානව හිමිකම් උල්ලංඝන සම්බන්ධයෙන් ජාත්‍යන්තර සංවිධාන හා එක්ව කටයුතු කිරීම තරයේ ප්‍රතික්ෂේප කර ඇති ජනාධිපතිවරයා වෙනස් මගක යමින් පවසා ඇත්තේ තමන් වගවීම හා සංහිඳියාව වෙනුවෙන් එක්සත් ජාතීන් සමඟ සහයෝගයෙන් වැඩ කිරීමට රජයේ ප්‍රතිපත්තිය බවයි.
“කල් පවතින සාමය සහ සංහිඳියාව දිනාගනු වස් වගවීම සහ මානව සම්පත් සංවර්ධනය සපුරා ගැනීම සඳහා එක්සත් ජාතීන්ගේ සංවිධානය සමග එක්ව වැඩ කිරීමට අපි කැපවී සිටිමු. විසඳීමට ඇති ගැටලු සඳහා ප්‍රජාතන්ත්‍රවාදී නීති රාමුව තුළ විසඳුම් දීමටත්, අවශ්‍ය ආයතනික සංශෝධන කරමින් යුක්තිය හා සංහිඳියාව සහතික කිරීම සඳහා ප්‍රජාතන්ත්‍රවාදී සහ නෛතික රාමුව තුල ගැටළු විසඳා ගැනීමටත් රජය කැපවී සිටී,” යනුවෙන් ජනාධිපති ගෝඨාභය රාජපක්ෂ ට්විටර් මගින් නිවේදනය කර තිබේ.
මානව හිමිකම් උල්ලංඝණ, යුද අපරාධ ඇතුළු මනුෂත්වයට එරෙහි අපරාධ සම්බන්ධ චෝදනා එල්ලවී ඇති බරපතල වැරදි ගැන විමර්ශනයට පත් කරනු ලැබූ උගත් පාඩම් හා ප්‍රති සන්ධාන කොමිසම, උදුලාගම කොමිසම, පරණගම කොමිසම ඇතුළු කමිටු වාර්තා විමර්ශනයට ජනාධිපතිවරයා විසින් ශ්‍රේෂ්ඨාධිකරණ විනිසුරු ඒ. එච්. එම්. ඩී නවාස් ගේ සභාපතිත්වයෙන් යුතු මානව හිමිකම් පිළිබඳ පූර්ව කොමිසම් සහ කමිටුවල තීරණ ඇගයීම සහ ඉදිරි ක්‍රියාමාර්ග ගැනීම පිළිබඳ ජනාධිපති පරීක්ෂණ කොමිසම 2021 ජනවාරියේදී පත් කරනු ලැබිණි. එහි සෙසු සාමාජිකයන් වන්නේ විශ්‍රාමික පොලිස්පති චන්ද්‍රා ප්‍රනාන්දු, විශ්‍රාමික දිස්ත්‍රික් ලේකම් නිමල් අබේසිරි, සහ යාපනය හිටපු නගරාධිපතිනි යෝගේෂ්වරී පත්කුණරාජාය.
“ජාත්‍යන්තර පරිමාණයේ බරපතල අපරාධ ශ්‍රිලංකාවේ සිදුවිනි දැයි විමසා බැලීමට තවත් කොමිසමක් පත් කිරීමේ සිතුවිල්ලම ඒ සා විකාරයක් මෙන්ම වින්දිතයන්ට අපහාසයක්ද වන හෙයින්ම මෙය රැවටිල්ලක් දැයි කල්පනාවට නැගීම සමාව දිය හැකි කාරණයකි” සත්‍ය සහ යුක්තිය පිලිබඳ ජාත්‍යන්තර ව්‍යාපෘතියේ (ITJP) විධායක අධ්‍යක්ෂිකා යැස්මින් සුකා නිකුත් කළ නිවේදනයක මෙම කොමිසම ගැන අවධාරණය කර තිබේ.
ත්‍රස්ත පනතේ වගන්ති තුනක් ගැන අවධානය යොමු කොට ඇති කොමිසමේ අතුරු වාර්තාව යෝජනා කරන්නේ 9 වැනි වගන්තිය මගින් රැඳවුම් නියෝග ක්‍රියාත්මක කිරීමේදී අවම මාස තුනක් හෝ ඊට වැඩි කාලයක් රඳවා සිටින සැකකරුවන්ට අධි චෝදනා ගොනු කරමින් නඩු පවරා නිම කිරීමත්, 11 වැනි වගන්තිය අනුව සිරකරුවන් බන්ධනාගාරයේ රැඳවීම වෙනුවට නිවාස අඩස්සියේ හෝ ගම් අඩස්සියේ තැබීමත්, 13 වැනි වගන්තිය අනුව ජනාධිපතිට උපදෙස් දීමට සියලු ජාතීන්ට අයත් අවම තිදෙනකුගෙන් යුත් උපදේශක සභාවක් පත් කිරීමත් ය.
ත්‍රස්තවාදය වැලැක්වීමේ පනත යටතේ පුද්ගලයන් අත්අඩංගුවට ගැනීම, දීර්ඝ කාලයක් නඩු විභාගයක් නොමැතිව සිර කොට තැබීම ඇතුළු මානව හිමිකම් උල්ලංඝණයන් පිළිබඳව යුරෝපා සංගමය විසින් මෑතකදී ගෝඨාභය රාජපක්ෂ ආණ්ඩුව වෙත අනතුරු අඟවා තිබිණි, යුරෝපා සංගමය වැඩි දුරටත් අවධාරණය කරන්නේ රාජපක්ෂ ආණ්ඩුව ඒ කෙරෙහි නිසි පියවර නොගතහොත් යළිත් වරක් GSP ප්ලස් සහනය අහිමිවී යා හැකි බවය.
theleader.lk