ජනාධිපති අපේක්ෂකයින් සම්බන්ධව සිදුකෙරෙන සියළුම ආකාරයේ ආදර්ශ ඡන්ද විමසීම් තහනම් බව මැතිවරණ කොමිසමේ සභාපති මහින්ද දේශප්‍රිය මහතා සඳහන් කරයි.
පෞද්ගලික ආයතන, උපකාරක පන්ති ආදී ස්ථානවල පැවැත්වෙන ආදර්ශ ඡන්ද විමසීම් සම්බන්ධව සහ ඒවා සමාජ මාධ්‍ය ඔස්සේ සමාජගතවීම සම්බන්ධව මැතිවරණ කොමිසම වෙත වාර්තාවී ඇතැයි මහින්ද දේශප්‍රිය මහතා ඊයේ(25) පස්වරුවේ විශේෂ ප්‍රකාශයක් සිදුකරමින් සඳහන් කළේය.
ජනාධිපතිවරයා තෝරා පත්කර ගැනීමේ පනතේ 78 වැනි වගන්තියට අනුව මෙවැනි ක්‍රියාකාරකම් අයුතු බලපෑම් යටතට ගැනෙන බවත් මෙවැනි ආදර්ශ ඡන්ද විමසීම්වලින් ලැබෙන ප්‍රතිඵලය මුලු දිවයිනටම සාමාන්‍යකරණය කිරීම වැරදි සහගත ක්‍රියාවක් බවත් මහින්ද දේශප්‍රිය මහතා සඳහන් කළේය.
මෙහිදී සභාපතිවරයා වැඩිදුරටත් සඳහන් කර සිටියේ එක් ස්ථානයක ප්‍රතිඵලය තවත් ස්ථානයකට බල නොපාන බවය. තැපැල් ඡන්ද ගණනය කිරීම සිදුවන්නේ ද සාමාන්‍ය ඡන්ද දායකයන් සිය ඡන්දය භාවිත කිරීමෙන් පසුව බවත් එසේ නොමැති වුවහොත් අනෙකුත් ඡන්ද දායකයන්ට ඉන් බලපෑමක් ඇතිවිය හැකි බවත් මහින්ද දේශප්‍රිය මහතා සඳහන් කළේය.
එබැවින් යහපත් නීතිගරුක පුරවැසියන් වශයෙන් එවැනි ක්‍රියාකාරකම්වලින් වලකින ලෙස මහින්ද දේශප්‍රිය මහතා ඉල්ලීමක් කළේය.
සමාජ මාධ්‍ය ජාලා ඔස්සේ සිදු කරනු ලබන මත විමසුම් (OPINION POLL) නැවැත්වීමට පියවර ගන්නැයි පැෆරල් සංවිධානය ඉල්ලා සිටි
මේ අතර පසුගියදා පැෆරල් සංවිධානය විසින් සමාජ ජාලා ඔස්සේ සිදුකරගෙන යන ලබන මතවිමසුම් පිළිබදව ප්‍රශ්ණ්‍ය මැතිවරණ කොමිසමේ අවධානයට යොමු කොට තිබුණි.
ජනාධිපතිවරණයට තරග වදින අපේක්ෂකයන් අතර, ජයග්‍රාහී අපේක්ෂකයන් තේරීමට සමාජ මාධ්‍ය ජාලා ඔස්සේ සිදු කරනු ලබන මත විමසුම් (OPINION POLL) නැවැත්වීමට කටයුතු කරන්නැයි පැෆරල් සංවිධානයේ විධායක අධ්‍යක්ෂ රෝහණ හෙට්ටිආරච්චි මහතා මැතිවරණ කොමිසමේ සභාපතිවරයාට දන්වා යවා ඇත.
පසුගිය සිකුරාදා මේ සම්බන්ධව ලිඛිතව කොමිසමේ සභාපතිවරයා වෙත දන්වා ඇති බව පවසන ඔහු පෙන්වා දෙන්නේ මෙවන් මත විමසුම් මගින් එක් එක් අපේක්ෂකයන් ප්‍රවර්ධනය කෙරෙන බවයි. ජනාධිපතිවරණයක් ප්‍රකාශයට පත් කර ඇති මෙවන් සමයක එමගින් සෙසු අපේක්ෂකයන්ට අගතියක් විය හැකි හෙයින් එවන් මත විමසුම් නවත්වා දැමීමට සුදුසු ක්‍රියා මාරගයක් ගැනීමට කටයුතු යොදන ලෙස ඉල්ලා ඇති බව ද ඔහු පවසයි.