දකුණේ භාෂණයේ නිදහස රැක ගැනීම සදහා වෙනුවෙන් පෙනී සිටීමට ඇති සූදානම උතුරේ දෙමළ මාධ්‍යවේදීන් විසින් පළ කර තිබේ. ජාති භේදයකින් තොරව, භාෂණයේ නිදහස රැක ගැනීම සදහා උතුර දකුණ වෙනසක් නොමැතිව වැඩ කිරීමට සුදානම් බවයි යාපනය මාධ්‍ය සමාජය පවසන්නේ. යාපනය මාධ්‍ය සමාජයේ උපදේශක මාධ්‍යවේදී රත්නම් දයාබරන් ඒ බව අවධාරණය කර ඇත්තේ ජනතාවට වෙනුවෙන් තොරතුරු වාර්තාකිරීමට ගොස් ජීවිත පුජා කළ සහ පැහැරගැනීමට ලක් වු සහෝදර මාධ්‍ය සගයන් වෙනුවෙන් උපහාර දැක්වීම සදහා යාපනය මාධ්‍ය සමාජයේ පැවැති උත්සවයක් අමතමිනි. මැයි 3 දා ට යෙදී තිබු ජාත්‍යන්තර මාධ්‍ය නිදහසේ දිනයේ දී එම උපහාරය පවත්වා තිබේ.
ඉතිහාසය දෙස හැරී බැලීමේදී අප්‍රේල් සහ මැයි යන මාස දෙක දෙමළ මාධ්‍යවේදීන් වැඩි වශයෙන් බැට කෑ මාස බව සිහිපත් කරන මාධ්‍යවේදී රත්නම් දයාබරන් එහිදී තව දුරටත් අවධාරණය කර ඇත්තේ, වර්තමානය වන විට දෙමළ මාධ්‍යවේදීන්ට පමණක් නොව දකුණේ මාධ්‍යවේදීන්ටත් නිදහසේ සිය රාජකාරිය කිරීමට නොහැකි තත්වයක් උදා වී ඇති බවයි.
සමාජ මාධ්‍ය හරහා නිදහස් අදහස් පළ කිරීමේ අයිතිය උතුරට මෙන්ම දකුණටත් අහිමි වී ඇති බව ඔහු එහිදී වැඩි දුරටත් සඳහන් කර තිබේ. එවැනි තත්වයක් තුළ භාෂණයේ නිදහස රැක ගැනීම සදහා උතුර දකුණ වෙනසක් නොමැතිව වැඩ කිරීමට සුදානම් බව මාධ්‍යවේදී රත්නම් දයාබරන් එහිදී අවධාරණය කර ඇත.
උතුරේ මහජන විරෝධයක් වාර්තා කිරීමට ගොස් ආරක්ෂක අංශ විසින් වලකනු ලැබූ මෙරට ප්‍රකට මානව හිමිකම් ක්‍රියාධරයකු වන රුකී ප්‍රනාන්දු විසින් 2021 ලෝක ජනමාධ්‍ය නිදහස් දිනය නිමිත්තෙන් ඉංශ්‍රීසි බසින් පල කොට ඇති ලිපියක සදහන් කර ඇති පරිදි මේ වසරේ ගෙවී ගිය මාස හතර තුලදී පමණක් මාධ්‍යවේදීන් හා සමාජ ක්‍රියාධරයන්ගේ භාෂණයේ නිදහසට තර්ජන එල්ල වු අවස්ථා 29 ක් පෙන්වා දී තිබේ. මර්දනකාරී නීති, ප්‍රතිපත්ති, අත්අඩංගුවට ගැනීම්, රඳවා තබා ගැනීම, වධහිංසා පැමිණවීම, තර්ජනය කිරීම, බිය ගැන්වීම, මාධ්‍යවේදීන්ට, මාධ්‍ය ආයතනවලට සහ නිදහසේ විවේචනාත්මක අදහස් පළ කරන්නන්ට හිරිහැර කිරීම සහ සීමා කිරීම නිසා බියෙන් තොරව නිදහසේ අදහස් ප්‍රකාශ කිරීමට බරපතල තර්ජන එල්ලවී ඇති අවස්ථා එයට ඇතුලත්ය. ඉන් කිහිපයක් සාරාංශ වශයෙන් පහත පරිදිය.
2021 අප්‍රේල් :
# වාහන නලා ශබ්ද කරමින් දැක්වූ විරෝධතාව මෙහෙයවූ තරුණයකු අත්අඩංගුවට ගැනීම,
# විරෝධතාවයක් වාර්තා කිරීමට ගිය ඡායාරූප මාධ්‍යවේදී වන මලික අබේකෝන්, පොලිස් අත්අඩංගුවේ දින කිහිපයක් රඳවා තබා ගනිමින් වධහිංසා පමුණුවනු ලැබීම,
# පාරිභෝගික අයිතිවාසිකම් ක්‍රියාකාරිකයකු වන අසේල සම්පත් විසින්, රජයේ සහන සැලසුමක් ප්‍රසිද්ධියේ විවේචනය කිරීමෙන් දින කිහිපයකට පසු, 2019 නිකුත් කරන ලද පැරණි වරෙන්තුවක් මත අත්අඩංගුවට ගැනීම,
# මුහුනු පොතේ ජනාධිපති ගෝඨාභය රාජපක්ෂ විවේචනය කළ බවට එල්ල වූ චෝදනා මත රජයේ නිලධාරීන් දෙදෙනකුට විරුද්ධව විනය පරීක්ෂණ පැවැත්වීම හා ස්ථාන මාරුවීම් ලබා දීම.
2021 මාර්තු :
මාධ්‍යවේදී සුජීව ගමගේ # පැහැරගෙන ගොස් වධහිංසා පැමිණ වු බවට කළ පැමිණිල්ලක් බොරුවකැයි චෝදනා නගා මුද්‍රිත හා වෙබ් මාධ්‍ය කිහිපයක සේවය කළ මාධ්‍යවේදියකු වන සුජීව ගමගේ අත්අඩංගුවට ගනු ලැබීම,
# ටියුබ්ටැමිල් යූ ටියුබ් නාලිකාවේ සහ එහි වෙබ් අඩවියේ, යාපනයේ පිහිටි කාර්යාලය පොලීසිය විසින් වටලා, ත්‍රස්තවාදය වැළැක්වීමේ පනත යටතේ දෙදෙනකු අත්අඩංගුවට ගෙන ඩෙස්ක්ටොප් පරිගණක, ලැප්ටොප් සහ තවත් උපකරණ පොලිස් භාරයට ගැනීම,
# පෞද්ගලික තොරතුරු සොයමින් සැක සහිත කණ්ඩායමක් සිටින බවට චෝදනා කරමින් බීබීසී දෙමළ වාර්තාකරු රන්ජන් අරුන් ප්‍රසාද් මාර්තු මාසයේ දී පොලිස් මූලස්ථානයට පැමිණිල්ලක් ඉදිරිපත් කිරීම,
# රක්වානේ සිසුවියක වන භාග්‍යා අබේරත්න විසින්, තම ප්‍රදේශයේ සිදුවන පාරිසරික විනාශය පිළිබඳව ජනප්‍රිය රූපවාහිනී නාලිකාවක් වෙත අදහස් දැක්වීමෙන් පසුව, ඇය බිය ගැන්වීම් සහ හිරිහැරයට ලක් කිරීම,
2021 පෙබරවාරි:
# LTTE නායක වේලුපිල්ලේ ප්‍රභාකරන්ගේ ඡායාරූප ඇතුළත් වීඩියෝවක් සමාජ මාධ්‍යවල පළ කිරීමේ චෝදනාව මත 25 හැවිරිදි තරුණයකු අත්අඩංගුවට ගැනීම,
# දෙමළ ජනයා විසින් මුස්ලිම් ජනතාවගේද සහාය ඇතිව නැගෙනහිර පොතුවිල් සිට උතුරේ පොලිකන්ඩි දක්වා සංවිධානය කළ දින 05ක P2P පාද යාත්‍රාව ආරම්භයට පෙර, පාගමන අතරතුර සහ පාගමන අවසන් වීමෙන් පසුවද අධිකරණ නියෝග හා පොලිස් ප්‍රශ්න කිරීම් ආදී වශයෙන් විවිධ බිය ගැන්වීම් වලට ලක් කිරීම,
# කතරගම පොලිසියේ පොලිස් නිලධාරියකු විසින්, ලංකාදීප පුවත්පතේ කතරගම ප්‍රාදේශීය වාර්තාකරු එම්. කේ. නන්දසේනට දුරකථනයෙන් තර්ජනය කිරීම,
2021 ජනවාරි :
# වෙබ් අඩවියක ලේඛකයකු වන ෆාසල් මුහම්මද් නිසාර්, සිවිල් හා දේශපාලන අයිතිවාසිකම් පිළිබඳ ජාත්‍යන්තර සම්මුති පනත (ICCPR) යටතේ අත්අඩංගුවට ගැනීම,
# පොලිසිය භාර රාජ්‍ය අමාත්‍ය සරත් වීරසේකර විසින් මාධ්‍යවේදී ශිරාන් රණසිංහට සහ මව්බිම අධ්‍යක්ෂක සිසිර පරණතන්ත්‍රි හට, මව්බිම පුවත්පතේ පළ වූ වාර්තාවක් සම්බන්ධයෙන් දුරකතනයෙන් තර්ජනය කිරීම,
# නිදහස් මාධ්‍යවේදියකු සහ පරිසර ක්‍රියාකාරිකයකු වන ලක්මාල් රණබාහු විසින් පාරිසරික හානියක් පිළිබඳ පැමිණිල්ලක් ඉදිරිපත් කර ආපසු පැමිණෙමින් සිටියදී, පුද්ගලයන් කණ්ඩායමක් විසින් දරුණු ලෙස පහර දීම.
තවත් සිද්ධීන් කිහිපයක් කෙටියෙන් මෙසේය.
මාධ්‍යවේදී ලසන්ත වික්‍රමතුංගේ දියණිය # ඝාතනයට ලක්වූ කතුවරයකු වන ලසන්ත වික්‍රමතුංගේ දියණිය විසින්, යුක්තිය ඉටු නොවීම පිළිබඳව වොෂිංටන් පෝස්ට් පුවත්පතට ලියූ ලිපියක් පදනම් කරගනිමින්, විදේශ කටයුතු අමාත්‍යාංශයේ ලේකම් සහ ජනමාධ්‍ය අමාත්‍යවරයා විසින්, ඇය ශ්‍රී ලංකාව විනාශ කිරීමට උත්සාහ කළ බවටත් එසේම ඇය විපක්ෂ දේශපාලන සහ ඩයස්පෝරා කණ්ඩායම් ජාලයකින් පාලනය වන බවටත් චෝදනා කිරීම,
# ගෝලීය දේශගුණික විපර්යාස දිනය සැමරීම සඳහා තරුණයන් පිරිසක් විසින් කොළඹ විහාරමහදේවි උද්‍යානයේ ප්‍රදර්ශනය කළ චිත්‍රයක් පොලීසිය සහ කොළඹ මහ නගර සභාව විසින් ඉවත් කිරීම,
# මීට මාස දෙකකට පෙර, මාධ්‍යවේදීන් දෙදෙනකු සමග ලේඛක රුකී ප්‍රනාන්දු විරෝධතාවයක් වාර්තා කිරීම සදහා උතුරේ ඉරනතීව් දිවයිනට යාමට උත්සාහ කළ විට නාවික හමුදාව විසින් එය තහනම් කිරීම,
# තරුණ කවියකු වන අහ්නාෆ් ජසීම් සහ මානව හිමිකම් නීතිඥ හෙජාස් හිස්බුල්ලා කිසිදු චෝදනාවකින් තොරව රැඳවුම් භාරයේ දැනට වසරක් පමණ කාලයක් තිස්සේ රඳවාගෙන සිටීම.
# මඩකලපුව ප්‍රදේශයේ මාධ්‍යවේදියකු වන මුරුගපිල්ලෙයි ගෝකුලදාසන් මාස 5 ක පමණ කාලයක් කිසිදු චෝදනාවක් ඉදිරිපත් කිරීමකින් තොරව පොලීසිය භාරයේ රඳවාගෙන සිටීම.
# ෆේස්බුක් සටහනක් සම්බන්ධයෙන් ICCPR පනත යටතේ අත්අඩංගුවට ගෙන මාස පහකට පමණ පසුව ඇප මත මුදා හරින ලද, සමාජ මාධ්‍ය ක්‍රියාධර රම්සි රසීක්ට එරෙහි නඩුව ද තවමත් විභාග වෙමින් පැවතීම.
theleader .lk