දෙමළ බහුතරයක වාසභුමිය වන උතුරු නැගෙනහිර පළාත් සිංහලකරණය කිරීමේ රාජපක්‍ෂ ආණ්ඩුවේ සැලසුම හෙලා දකිමින් බේද නොතකා දෙමළ පක්ෂ ඒකාබද්ධ විරෝධයක් දියත් කර තිබේ.
වවුනියාව ප්‍රාදේශීය ලේකම් කාර්යාලය ඉදිරිපිටට අද [15] පෙරවරුවේ රැස්වූ දෙමළ දේශපාලන නායකයන්, පාලත් පාලන ආයතන නියෝජිතයන් හා සාමාන්‍ය ජනතාව උද්ඝෝෂණය කළේ වවුනියා නෙදුන්කර්නි ප්‍රදේශයේ සිංහල ජනාවාස ඉදිකිරීමේ ආණ්ඩුවේ සැලසුමට එරෙහිවයි.
වවූනියාව වැනි දෙමළ ජනතාව බහුතරය වෙසෙන ප්‍රදේශ ඉලක්ක කර ගනිමින්, සිංහල ජනතාව රැගෙන විත් පදිංචි කිරීම ඉතා සුක්ෂම අයුරින් ප්‍රදේශයේ ජන සංයුතිය වෙනස් කිරීම ආණ්ඩුවේ අරමුණ වී ඇති බවට විරෝධතාකරුවෝ චෝදනා කරති.
උතුරේ පළාත් මායිම් වෙනස් කොට ජනගහන රටාව කෘතිම ලෙස වෙනස් කිරීම වහාම අත්හිටුවන ලෙස පක්ෂ බේද නොතකා උතුරු නැගෙනහිර මන්ත්‍රී කණ්ඩායමක් අභ්‍යන්තර ආරක්ෂාව සහ ස්වදේශ කටයුතු භාර අමාත්‍ය චමල් රාජපක්ෂගෙන් ඉල්ලා තිබේ.
සිංහල බහුතරයක් වෙසෙන පළාත් වලින් පවුල් දහස් ගණනක් උතුරු පළාතේ වවුනියාව දිස්ත්‍රික් මායිමේ පදිංචි කරවීමට ඇති සැලසුම් අනාවරණය වී ඇත්තේ ගම සමග පිළිසඳර 17 වැනි වැඩසටහන සඳහා දැන් බෝගස්වැව නමින් හැඳින්වෙන කොච්චියාන්කුලම් ගම්මානයට ජනාධිපතිවරයා පෙබරවාරි 3 වැනිදා ගිය අවස්ථාවේදීය.
එදින, “කැබිතිගොල්ලෑව ප්‍රාදේශීය ලේකම් කොට්ඨාශයේ කණුගහවැවින් පවුල් 600ක් සහ අනුරාධපුර දිස්ත්‍රික්කයේ පදවිය ප්‍රාදේශීය ලේකම් කොට්ඨාශයේ කම්බිලිවැවෙන් හා වෙහෙරතැන්නෙන් පවුල් 430 ක් වවුනියාව උතුර ප්‍රාදේශීය ලේකම් කොට්ඨාශයේ වෙඩිවෛත්‍යකල්ලු ග්‍රාමනිලධාරී වසම තුල පදිංචි කිරීම ගැන වවුනියාව දිස්ත්‍රික් ලේකම් එස්. එම් සමන් බන්දුලසේන විසින් ජනාධිපතිතුමාගේ අවධානයට යොමු කරන ලදී,” යි දෙමළ පාර්ලිමේන්තු මන්ත්‍රීවරුන් විසින් අභ්‍යන්තර ආරක්ෂාව සහ ස්වදේශ කටයුතු භාර ඇමැති චමල් රාජපක්‍ෂ වෙත ඉකුත් ඔක්තෝබර් 22 දා යවා ඇති ලිපියක දැක්වේ.
බෝගස්‌වැවට අමතරව යුද්ධයෙන් පසු නාමල්ගම 1, 2 , සැලළිහිණිගම සහ නන්දිමිත්‍ර ගම නමින් අලුතින් පිහිටුවන ලද ජනාවාස වල දැනටත් හමුදා සෙබළුන් ඇතුළු පිට පළාත් වලින් ගෙනා සිංහල පවුල් පදිංචි කරවා තිබේ.
“පළාත් මායිම් වෙනස් කිරීම සඳහා වන මෙම උත්සාහයේ යටි අරමුණ වන්නේ ජන සංයුතිය වෙනස් කොට දෙමළ ජනතාවගේ දේශපාලන ශක්තිය දුර්වල කිරීමයි. රටේ මුලෝපායික තීරණයක් වන පළාත් මායිම් වෙනස් කිරීම සිදු කළ යුත්තේ ඡන්දයෙන් තේරී පත්වූ නියෝජිතයන් ඇතුළු අදාළ පාර්ශව සමග විචාරනයෙනි. කෙසේවෙතත්, එවැනි සාකච්ඡාවක් කිසි කලෙකත් සිදුවී නැත,” යි දෙමළ දේශපාලකයෝ පවසති.
ඇම්.ඒ සුමන්දිරන්, ගජේන්ද්‍ර කුමාර් පොන්නම්බලම්, සෙල්වම් අඩෙයික්කලනාදන්, සෙල්වරාජා කජේන්ද්‍රන්, සුබ්‍රමනියම් නෝහරාදලිංගම්, සිවඥානම් ශ්‍රීධරන්, ශානක්‍යන් රාසමානික්කම් සහ චාල්ස් නිර්මලනාදන් යන මන්ත්‍රීවරුන්ද, දෙමළ ජාතික සන්ධානයේ තවරාසා කලෙයිඅරසන් ද ලිපියට අත්සන් තබා තිබුණි.
අලුතින් පවුල් පදිංචි කරවීමට නියමිත වෙඩිවෛත්‍යකල්ලු ගම්මානය පිහිටා ඇත්තේ වවුනියාව නගරයේ සිට කිලෝමීටර් 40ක් පමණ දුරින් නැගෙනහිරින් හා දකුණින් අනුරාධපුර දිස්ත්‍රික්කයේ පදවිය හා කැබිතිගොල්ලෑව ප්‍රාදේශීය ලේකම් කොට්ඨාසවලටත් මායිම්වය.
හේන් ගොවිතැන ප්‍රධාන ජීවිකාව කොටගත් පවුල් 478 කට අයත් 1200ක් දෙනා දැනට එගම වාසය කරන බව ජනාධිපති මාධ්‍ය ඒකකය පවසයි.
”මේ ගැන කතා කරන්නට අමාත්‍ය චමල් රාජපක්‍ෂ අවස්ථාවක් ලබා දී තිබුනද අවසන් මොහොතේ එය අවලංගු කළා” යැයි උතුරු නැගෙනහිර සිංහලකරණයට විරෝධය දැක්වූ දෙමළ ජාතික ජනතා පෙරමුණේ නායක ගජේන්ද්‍ර කුමාර් පොන්නම්බලම් පාර්ලිමේන්තුවේදී ප්‍රකාශ කළේය.
උතුරු නැගෙනහිර සිංහලකරණය ගැන කතෝලික සභාව ජාත්‍යන්තරයට කියයි
ඉකුත් සතියේ යාපනේ සංචාරයක යෙදුනු මෙරට ස්විට්සර්ලන්ත තානාපති ඩොමිනික් ෆර්ග්ලර් හමුවූ කතෝලික සභාවේ උතුරු නැගෙනහිර පළාත් නියෝජනය කරන මන්නාරම, ත්‍රිකුණාමලය, යාපනය හා මඩකළපුව රදගුරු සිව් කට්ටුව කියා සිටියේ මන්නාරම, ත්‍රිකුණාමලය හා මුලතිව් දිස්ත්‍රිකවල සෘජුව හා වක්‍රව සිංහලයන් ගෙනැවිත් පදිංචි කරමින් සැලසුම් සහගතව ජන සංයුතිය වෙනස් කිරීමේ ආණ්ඩුවේ වෑයම ගැන ජනතාව පසු වන්නේ කනස්සල්ලෙන් බවයි.
”අපේ ඉඩම් අපිට දියව්”,
”පුරාවිද්‍යා දෙපාර්තමේන්තුව- අපේ ඉතිහාසය වෙනස් කරන්න එපා”, `
”බලවත්තු ජාතිවාදය පතුරනවා”, `
”සිංහල ජනපදකරණය නවතනු”යනුවෙන් සටන් පාඨ ලියවුනු පුවරු රැගත් උද්ඝෝෂකයෝ විරෝධය දැක්වුහ.
ජනාධිපති වෙත යොමු කිරීමට වවුනියා උතුර ප්‍රාදේශිය ලේකම්වරයා වෙත සන්දේශයක්
වවුනියාවේ සිංහල ජනපදකරණය නවත්වන ලෙස ඉල්ලා ලියවුනු සන්දේශයක් ජනාධිපති ගෝඨාභය රාජපක්‍ෂ වෙත යොමු කිරීමට වවුනියා උතුර ප්‍රාදේශිය ලේකම්වරයා වෙත බාර දී තිබේ.
විරෝධතාවට එක්වූවන් අතර තමිල් අරසු කච්චි නායක මාවෙයි සේනාධිරාජා, සුබ්‍රමනියම් නෝහරාදලිංගම්, සිවඥානම් ශ්‍රීධරන්, හිටපු පාර්ලිමේන්තු මන්ත්‍රී ශිව ශක්ති ආනන්දන්, ශාන්ති ශ්‍රී ස්කන්ධරාජා, වවුනියාව ප්‍රාදේශීය සභාවේ සභාපති එස්.තනිහාසලම් යෝගරාසා, වවුනියාව නගරාධිපති අයි.ගෞතමන් සහ නව ප්‍රජාතන්ත්‍රවාදී මාක්ස්-ලෙනින් පක්ෂයේ ඇන්. ප්‍රදීපන් ද වුහ.
theleader.lk