අගමැති රනිල් වික්‍රමසිංහ මහතා වර්තමාන ආණ්ඩුවේ සිටින ඇමැති මණ්ඩලයේ හා විපක්ෂයේ සිටින හිටපු මැති ඇමැතිවරුන් සම්බන්ධයෙන් එල්ල වී ඇති චෝදනා සම්බන්ධයෙන් ලිපිගොනු රැසක් විමර්ශනය කිරීම සඳහා මූල්‍ය අපරාධ කොට්ඨාසයට හා දූෂණ මර්දන කමිටුව නම් වන කැබිනට් අනුකමිටුව වෙත ලබා දී ඇති බව අගමැති කාර්යාල ආරංචි මාර්ග සඳහන් කරයි.
අගමැතිවරයා මෙහි දී තරමක ආවේගයෙන් කතා කර ඇත්තේ වත්මන් සම්මුතික ආණ්ඩුව බිඳ වැට්ටවීම සඳහා ඇතැම් ඇමැතිවරයකු හොර රහසේ කටයුතු කරන බවට ලැබී තිබෙන තොරතුරු අනුව බව ද පැවසේ. එසේම පසුගිය කාලයේ ආණ්ඩුව හා අගමැතිවරයා ඉලක්ක කර ගනිමින් මාධ්‍ය මඟින් ගෙන ගිය ඇතැම් පදනම් විරහිත ප්‍රචාර සම්බන්ධයෙන් ද අගමැතිවරයා දෝෂ දර්ශනයට ලක් කර තිබේ. මේ සම්බන්ධයෙන් නුදුරේම අගමැතිවරයා යම් පියවරක් ගැනීම සිදු වනු ඇති බව ද එම ආරංචි මාර්ග පවසයි.
කෙසේ නමුත් මහ බැංකු බැඳුම්කර සිදුවීම පාදක කර ගනිමින් ඒකාබද්ධ විපක්ෂය පාර්ලිමේන්තුවට විශ්වාසභංග යෝජනාවක් ගෙන එන බවට සිදු කෙරුණු ප්‍රකාශ මේ වන විටත් හකුළා ගැනීමට එම කණ්ඩායම තීරණය කර ඇති බවත් දැන ගැනීමට ඇත.
– සුභාෂ් ජයවර්ධන
www.sathhada.lk