උතුරු හා නැගෙනහිර ජීවත් වන ජනතාවගේ මානව හිමිකම් කඩවීම පිළිබඳව දෙස් විදෙස් ජනතාව දැනුවත් කිරීම වෙනුවෙන් පොතුවිල් සිට පොලිකන්ඩි දක්වා දියත් කළ සාම පාදයාත්‍රාවට නායකත්වය දුන් දෙමළ මහජන නියෝජිතයකුගෙන් පොලිස්ථාන අටක නිලධාරීන් එකවර ප්‍රකාශ සටහන් කරගෙන තිබේ. “වැල්වැටිතුරෙයි පොලීසිය, මාන්කුලම් පොලීසිය, ඊට අමතරව මුතුර් පොලීසිය, කිලිනොච්චි පොලීසිය, වාලච්චේන, කාත්තන්කුඩි, සමන්තුර ඒ වගේ ගොඩක් පොලිස් වසම් වලින් ඇවිල්ලා මගෙන් කට උත්තර ලබා ගත්තා.” උතුරු නැගෙනහිර පිහිටි තවත් පොලිස්ථාන කිහිපයකින්ම ඉදිරියේදී තමන්ගෙන් ප්‍රකාශ සටහන් කර ගැනීමට නියමිත බවයි දෙමළ ජාතික සන්ධානයේ නවක පාර්ලිමේන්තු මන්ත්‍රී ශානක්‍යන් රාසපුත්‍රම් පවසන්නේ. ඔහු ඒ බව සදහන් කළේ පොලිස් නිලධාරීන් වෙත පෙබරවාරි 19 සිකුරාදා ප්‍රකාශ ලබා දීමෙන් පසු මාධ්‍ය හමුවක් කැදවමිනි.
P2P නමින් ප්‍රකට වූ පාද යාත්‍රාව “ප්‍රජාතන්ත්‍ර විරෝධි” යයි පවසන පොලිස් නිලධාරීන් ඊට එක්වීම සම්බන්ධයෙන් තමාගෙන් ප්‍රශ්න කළ බව මාධ්‍ය හමුවේ අනාවරණය කළ තරුණ මන්ත්‍රීවරයා අවධාරණය කළේ පා ගමන දියත් කළේ රටේ ප්‍රජාතන්ත්‍රවාදය ඇති කිරීම වෙනුවෙන් බවයි. රටේ පාතාලය, මත්ද්‍රව්‍ය, සහ සොරුන් හිස ඔසවා සිටින මොහොතක ඔවුන් සොයා ගැනීමට අසමත් වීමට නිදහසට කරුණු ලෙසින් ලෙසින් පොලීසිය කාර්යමණ්ඩලයේ හිගයක් පවතින බවට හේතු ඉදිරිපත් කරන බව පෙන්වා දුන් මන්ත්‍රීවරයා එහිදී ප්‍රශ්න කළේ, එක පුද්ගලයකුගෙන් කට උත්තර ගැනීමට මෙතරම් පොලිස් නිලධාරීන් පිරිසක් යොදවද්දී පොලිසියට අනිකුත් රාජකාරි සදහා නිලධාරින් කොහෙන්ද යනුවෙනි.
කොරෝනා වසංගත ව්‍යාප්තිය හමුවේ විශාල ජන සහභාගීත්වයකින් පාද යාත්‍රාවක් දියත් කිරීම පිළිබදව ද පොලිස් නිලධාරීන් ප්‍රශ්න කළ බව පවසන මන්ත්‍රීවරයා මාධ්‍යහමුවේ තව දුරටත් පෙන්වා දුන්නේ, ජනාධිපතිවරයා විශාල පිරිසක් අගනගරයට කැදවා නිදහස් දිනය සමරන ආකාරය දකින ජනතාව එය ආදර්ශය ගන්නා බවයි. ” අපිටත් දෙන ආදර්ශය ඒ වගේ දේවල් තමයි.”
සිංහලයන්ට ආරාධනයක්
දෙමළ මුස්ලිම් ජනයාගේ අයිතින් දිනා ගැනීම වෙනුවෙන් පාද යාත්‍රාව දියත් කළ අහිංසක ජනතාවට නඩු දමන බවට පෙන්වීමට කරන උත්සාහයන් නතර කර ආණ්ඩුව රට කැබෙලි කර විදෙස් රටවලට විකිනිමට එරෙහි වීම සදහා දෙමළ, මුස්ලිම් ජනයා හා එක්කාසු වන ලෙස මන්ත්‍රීවරයා සිංහල ජනතාවට ඇරයුම් කළේය. ” මේ රටේ දෙමළ මුස්ලිම් ජනතාවත් ශ්‍රී ලාංකිකයෝ. ඉස්සරලා අපේ අයිතිවාසිකම් ලබා දෙන්න කියලා තමයි අපි ඉල්ලන්නේ. ඉතින් ශ්‍රී ලංකාවේ අපේ අයිතිවාසිකම් ලබා ගන්න ඉස්සරලා ශ්‍රී ලංකාවක් තියෙන්න ඕන සිංහල, දෙමළ මුස්ලිම් ඔක්කෝටම. තව ටික දවසකින් මේක “චී” ලංකාව වෙයිද කියලත් අපිට සැකයක් තියනවා. ඉතින් ඒක නිසා ඉතාම අවධානයෙන් සිංහල ජනතාවත් මේකට මුහුණ දෙන්න ඔන ” දෙමළ සහ මුස්ලිම් ජනතාවගේ මානව හිමිකම් උල්ලංඝනය කිරීම් දිසාවට ජාත්‍යන්තර අවධානය යොමු කර ගැනීමත් ඉලක්ක කරගත් සාම පාද යාත්‍රාවේ නායක කාරකාදීන්ට එරෙහිව ශ්‍රී ලංකාණ්ඩුව දියත් කරන ප්‍රහාර උත්සන්න කරමින් එහි මුලිකත්වය ගත් පුද්ගලයන් සම්බන්ධයෙන් පොලිසිය මේ වන විටත් විමර්ශන අරඹා තිබේ.
පාද යාත්‍රාවට සහභාගි වූ තරුණයකු පේදුරුතුඩුව පොලිසිය විසින් අත් අඩංගුවට ගෙන පැය හයකට ආසන්න කාලයක් ප්‍රශ්න කර මුදා හැර තිබුණි.
දෙමළ ජනතා නියෝජිතයන් කිහිපදෙනකුට සහ බිම් මට්ටමේ ක්‍රියාකාරීන් කිහිප දෙනකුට ද උසාවියේ පෙනී සිටින්නැයි පසුගියදා සිතාසි ද නිකුත් කර තිබුනි. දෙමළ ජාතික සන්ධාන මන්ත්‍රීවරුන් සිව්දෙනකු සහ දෙමළ ප්‍රගතිශීලී පෙරමුණේ නායකයා මේ වනවිටත් පොලීසිය විසින් කැඳවා ඇති අතර, ප්‍රශ්න කිරීම සඳහා පොලිසිය මගින් කැඳවනු ලැබීමට දිගු ලැයිස්තුවක් ඇති බවක් පෙනෙන්නට තිබේ. ආණ්ඩු විරෝධී දෙමළ පක්ෂවල සහයෝගය ඇතිව, උතුරේ හා නැගෙනහිර විවිධ සංවිධාන හා සිවිල් සමාජය එක්ව සංවිධානය කරන ලද P2P රැලියට දස දහස් සංඛ්‍යාත ජනතාවක් සහභාගි විය. එම සාම රැලියට බාධා පැමිණවීමේ අරමුණින් කල්තබාම පොලිසිය පාගමනට එරෙහිව වාරණ නියෝග රාශියක් ලබා ගෙන තිබුනි
කෙසේ වෙතත්, දෙමළ ජනතා නියෝජිතයන් , හිටපු මන්ත්‍රීවරුන්, පළාත් සභා සාමාජිකයන්, ආගමික නායකයන් සහ යුද්ධයෙන් පීඩිත වූ පවුල්වලට අමතරව පොදු මහජනතාව තම සහයෝගීතාව ප්‍රකාශ කරමින් සාම පාගමනට එක් වූහ. දෙමළ ජනතාවගේ ඉඩම් අහිමිකිරීම, උතුරු නැගෙනහිර හමුදාකරණය වතුකරයේ ජනතාවගේ දෛනික වැටුප රුපියල් දහස දක්වා වැඩි නොකිරීම, කොරෝනාබාධිතව මිය යන ඉස්ලාම් භක්තිකයන්ගේ මළ සිරුරු පුළුස්සා දැමීම, දෙමළ ජනතාවට එරෙහිව හතලිස් අවුරුද්දක් තිස්සේ යොදාගත් ත්‍රස්තවාදය වැළක්වීමේ පනත මුස්ලිම්වරුන්ට එරෙහිව යොදා ගැනීම, අතුරුදහන්වුවන්ගේ ඉරණම හෙළි නොකිරීම, දේශපාලන සිරකරුවන් දීර්ඝ කාලයක් නඩු නැතිව සිරගත කොට තැබීම, දෙමළ මළවුන් සිහිපත් කිරීමේ අයිතිය ඇවිරීම හා මානව හිමිකම් උල්ලංඝන එළිදරව් කිරීමට වෙහෙසෙන මාධ්‍යවේදීන් හා බහුජන ක්‍රියාධාරීන් දඩයම් කිරීමට එරෙහිවීම ද සාම පාද යාත්‍රාවේ අරමුණු ලෙස උතුරු නැගෙනහිර සිවිල් සමාජ සංසදය විසින් එක්සත් ජාතීන් වෙත යවා ඇති සන්දේශයක දැක්වේ. අතුරුදහන් කරනු ලැබුවන්ගේ ඥාතීන්, කතෝලික රදගුරුවරුන්, ක්‍රිස්තියානි පුජකවරුන් හා කන්‍යා සොයුරියන්, දෙමළ විපක්ෂ මන්ත්‍රීවරුන්, බහුජන ක්‍රියාධරයන්, මුස්ලිම් ප්‍රජා නායකයන්, වෘත්තීය සමිති හා වෙළෙඳ සංගම් නායකයන් ට අමතරව පීඩාවට පත් සාමාන්‍ය වැසියන්ද දහස් ගණනින් විරෝධතාවයට එක්ව සිටියහ. එම විරෝධතාව මෙහෙයවූ නායකත්වයට නඩු දමා හිරේ යවන බවට මහජන ආරක්ෂාව භාර ඇමැති සරත් වීරසේකර ඉකුත් දා අනතුරු අඟවා තිබුණි.
theleader.lk