මීගමුව , දළුපත , පිල්ලෑව පාරේ සුපර්සෝනික් අධිපති අනුර මහතා ගේ නිවස අසල පාර මැද ඇති වලවල් නිසා මෙම ස්ථානයේ ගමන් කරන අය දැඩි අපහසුතාවකට පත්වේ. අවස්ථා ගනනාවකදී මේ ගැන මතුකරමින් අප අපගේ වෙබ් අඩවියට ලිව්වෙමු. නමුත් මේ සඳහා විසඳුමක් දක්නට නැත . 
එම ස්ථානයේ සිට තිඹිරිගස්කටුව පාරට වැටී මෙතෝදිස්ත දේවස්ථානය පසුකර ගොස් අඩිහැට පාර දිගේ ගොස් ගල්කටුව පාරෙන් වටයක් ගොස් නැවත මෙම ස්ථානයට එනවිට මෙවැනි කඩතොළුවී ගිය වලවල් 16 ක් පමණ ඇත .
වලේ වැටීම මොලේට ලාබයක් යැයි කීවේ මෙවැනි වලවල් සම්බන්ධව නොවේ. එසේ කීවේ තමන්ට පාඩමක් කියා දෙන අමාරුවේ වැටුනු අවස්ථා පිළිබඳවය. අපි එවැනි අවස්ථා පැමිණියද පාඩම් ඉගෙන ගන්නා බවක් පෙනෙන්නේ නැත . විශේෂයෙන් අපි පාලකයින්ගෙන් බලාපොරොත්තු වන්නේ ඔවුන් ඡන්ද වකවානු තුළ ඉදිරිපත් කරන පොරොන්දු නිසි ලෙස ඉටුකරාවියැයි කියාය . ඔවුන් පොරෙන්දුවූ ආකාරයට කටයුතු කළේ නම් මෙකී පාරවල් වල මෙවැනි වලවල් තිබිය නොහැක . මේ අනුව අපි හැමවිටම වලේ වැටෙති. නමුත් මොලේ පෑදෙන පාටක් නැත . මෙවර අප පත්කර ඇති නගරයේ පාලකයා පාරේ වලවල් මගහැර වෙට්ටු දමා වෙන ගමන් යති. තමන්ට ගැතිවී සිටින අනෙකුත් මන්ත්‍රී වරු , පාක්ෂිකයින්ට වරදාන , වරප්‍රසාද ලබාදීමට කටයුතු කරති. ඒ සඳහා වියදම් කිරීමට ඕනෑ තරම් සල්ලි ඔවුන්ට ඇත . නමුත් , නගරයේ පාරවල්වල දිනෙන් දින හෑරෙන වලවල් නිසා ගමන් කරන මගීන් අපහසුතාවට පත්වේ. ඒ සඳහා ඔවුන්ට ප්‍රතිපාදන නැත .
මෙම වලක් මගහැර යන අවස්ථාවක වාහන පෙරලෙන අයුරු අනතුරු වලට මුහුණ දෙන අයුරු , අප දැක ඇත්තෙමු , අසා ඇත්තෙමු . නමුත් පාලකයින්ට මේවා ගැන කිසිදු හැඟීමක් නැත . ඒ නිසා ජනතාව මේ ගැන අවධියෙන් ක්‍රියාත්මක විය යුතුය .