අගමැති මහින්ද රාජපක්ෂ විසින් බුවනෙක හෝටලය ලෙස නම් කරන කුරුණෑගල ඓතිහාසික ගොඩනැගිල්ල කඩා බිඳ දැමීමේ සිද්ධිය සම්බන්ධයෙන් සිදුකෙරෙන පරීක්‍ෂණ මේ වනවිට සම්පූර්ණයෙන්ම අවසන් කර ඇත.
එහි වාර්තාවද සකස් කර අවසන් බව පුරාවිද්‍යා අධ්‍යක්ෂ ජනරාල් ආචාර්ය සෙනරත් දිසානායක ‘නෙත් නිවුස්’ වෙත අද (ජුලි 20) උදැසන කියාසිටියේ ය.
අදාළ සිද්ධිය සම්බන්ධයෙන් සොයා බැලීමට අගමැතිවරයා විසින් පංච පුද්ගල විද්වත් කමිටුවක් පත් කරනු ලැබු අතර ඊට අදාළ වාර්තාව අද (21) දිනය වනවිට ලබාදිය යුතු බවට දන්වා තිබිණ. ඒ අනුව බොහෝ දුරට අද දිනයේ මෙම වාර්තාව අගමැතිවරයා වෙත භාරදීමට හැකිවනු ඇති බව එම කමිටුවේ සභාපතිවරයා වන ආචාර්ය සෙනරත් දිසානායක විශ්වාසය පළ කරයි.
”නගරාධිපතිගේ මයිල්ගහකට අත තියන්න දෙන්නෑ” – ජොන්ස්ටන්
කෙසේවෙතත්, ‘මහින්දවාදී’ අමාත්‍ය ජොන්ස්ටන් ප්‍රනාන්දු පවසන්නේ, අදාල ගොඩනැගිල්ල කඩා බිඳ දැමීම පිළිබඳව ශ්‍රී ලංකා පොදුජන පෙරමුණේ (පොහොට්ටුව) සාමාජිකයන් පවා කුරුණෑගල නගරාධිපති තුෂාර සංජීව හට චෝදනා කරන නමුත් තමා සිටින තෙක් නගරාධිපතිවරයා ආරක්ෂා කරන බවයි.
‘පොහොට්ටු’ පක්ෂයේ ජනහමුවක් අමතමින් ඔහු එබව අවධාරණය කර සිටියේය.
“අපි අපේ පක්ෂෙ මිනිස්සු රකිනවා. දැන් ලොකුම ප්‍රශ්නෙ බුවනෙක හෝටලේ. ඒක බුවනෙක රජතුමාගෙලු. දැන් පොල් ලී මඩුවෙ චන්දරේගෙ පුතා තමයි බුවනෙක රජ්ජුරුවො වෙලා තියෙන්නේ.
ප්‍රේමදාසගෙ අය තමයි ඕක ඇතුලෙ ඉන්නෙ. මම ජනාධිපතිතුමාට, අගමැතිතුමාට ඊයෙ කතා කරලා කිව්වා පරීක්ෂණයක් කරන්න කියලා. අපේ ආණ්ඩුව ආවට පස්සෙ බලන්න එයාගෙ ටෙලිෆෝන් නොම්බර කාටද කතා කරලා තියෙන්නේ කියලා..පුරාවිද්‍යා කොමසාරිස්.
මම දිස්ත්‍රික් නායකා වෙලා ඉන්න කල් නගරාධිපතිතුමාගෙ එක මයිල් ගහකට අත තියන්න දෙන්නෙ නෑ.” යැයි අමාත්‍යවරයා වැඩි දුරටත් පැවසිය.
“එතන රාජසභා මණ්ඩපයක් තිබුණේ නෑ කියලාත් කියනවා, අපේ හාමුදුරුවනේ” – අගමැති
කුරුණෑගල රාජසභා මණ්ඩපය කඩා බිඳ දැමීමේ සිද්ධිය සම්බන්ධයෙන් සොයා බැලීමට පංච පුද්ගල විද්වත් කමිටුවක් පත් කරනු ලැබු අග්‍රාමාත්‍ය හා බුද්ධශාසන, සංස්කෘතික සහ ආගමික කටයුතු අමාත්‍ය මහින්ද රාජපක්ෂ ඊයේ (ජුලි 20) ප්‍රසිද්ධ රැස්වීමක් අමතමින් කියා සිටියේ, එහි මණ්ඩපයක් නොතිබූ බවටත්, මෙය අළුත් නිර්මාණයක් බවටත් පැවසෙන බවත් ය.
අදාල ගොඩනැගිල්ල එහි නගාරාධිපතිවරයාගේ මැදිහත්වීමෙන් කඩා දැමීමේ සිද්ධිය සම්බන්ධයෙන් වාර්තාවක් ඉල්ලා ඇති බවත් තමන් එම වාර්තාව ලැබෙන තෙක් බලා සිටින බවත් අගමැතිවරයා එහිදී කියා සිටියේය.
එහි මණ්ඩපයක් නොතිබූ බවත්, මෙය අළුත් නිර්මාණයක් බවත් පැවසෙන බව එහිදී පවසා සිටි අගමැතිවරයා, හත්වන බුවනෙකබාහු රජුට මුස්ලිම් භාර්‍යාවක්ද සිටි බවත් මෙම චෝදනා නගන්නේ මඩ ගැසීමේ අරමුණින් බවත් සඳහන් කළේය.
”අපේ හාමුදුරුවනේ පුරාවස්තු ගොඩනැගිල්ලක් කැඩුවා කියලා ලොකූ කලබලයක් කරා. මේක අලුතෙන් හැදුන එකක් කියනවා සමහරු කියනවා එහෙම මණ්ඩප්පයක් තිබුණේ නැහැ කියලා. යුගය ගැන කතා කරනවා එතුමාට භාර්යාවන් ගොඩක් හිටියා මුස්ලිම් භාර්යාවකුත් හිටියා. කාන්තාවක් කුමාරිකාවක්. ඒ කතාව තියෙනවා අර එයාගේ පුතා රජ කරලා එල්ලපු කතාව…” අගමැතිවරයා වැඩිදුරටත් කියා සිටියේය.
‘ඩෝසර් කර ඇත්තේ බුවනෙකබාහු රාජ සභාවයි‘ – අගමැතිගේ පංච පුද්ගල කමිටුවේ සභාපති කියයි
කුරුණෑගල නගරාධිපති විසින් කඩා බිඳ දැමු ගොඩනැගිල්ලේ ඉතිහාසය පිළිබඳව අගමැතිවරයා එසේ සැකමතු කරද්දී, ඔහු විසින් එම සිද්ධිය සම්බන්ධයෙන් සොයා බැලීමට පත්කල පංච පුද්ගල විද්වත් කමිටුවේ සභාපති පුරාවිද්‍යා අධ්‍යක්ෂ ජනරාල් ආචාර්ය සෙනරත් දිසානායක පවසන්නේ, කුරුණෑගල නගරාධිපතිවරයා විසින් ඩෝසර් කර ඇත්තේ කුරුණෑගල රාජධානියේ රාජසභා මණ්ඩපය බවට හදුන්වන ඉපැරණි ගොඩනැගිල්ල බවට මූලික නිරීක්‍ෂණයේදී හදුනාගත් බවයි.
ඔහු එබව කියා සිටියේ, අදාළ සිද්ධිය සම්බන්ධයෙන් සොයා බැලීමට අගමැති විසින් පත්කල පංච පුද්ගල විද්වත් කමිටුව ජුලි 18 දිනයේ එම ස්ථානය නිරීක්ෂණය කරනු ලැබු අවස්ථාවේදී මාධ්‍යවේදීන් කළ විමසීමක දිය.
මෙම පුරා විද්‍යාත්මක වටිනාකමකින් යුත් මෙම ගොඩනැගිල කඩා බිඳ දැමීමේ සිද්ධියට සම්බන්ධ කුරුණෑගල නගරාධිපතිවරයා, මෙවර මහ මැතිවරණයට කුරුණෑගල දිස්ත්‍රීක්කයෙන් තරඟ කරන අගමැති මහින්ද රාජපක්ෂගේ මෙන්ම අමාත්‍ය ජොන්ස්ටන් ප්‍රනාන්දුගේ කුරුණෑගල ආසනයේ මැතිවරණ ප්‍රචාරක කටයුතු බාර ප්‍රධානියාය.
theleader.lk