රාජ්‍ය වියදම් අනුමත කිරීම ව්‍යවස්ථානුකූලව ක්‍රියාත්මක කිරීම සම්බන්ධයෙන් පැනනැගී ඇති බරපතල මුල්‍ය අර්බුදය විසඳා ගැනීම සඳහා වූ යෝජනා ඇතුලත් විශේෂ ලිපියක් හිටපු මුදල් අමාත්‍ය මංගල සමරවීර විසින් ජනාධිපති ගෝඨාභය රාජපක්ෂ වෙත බාර දී ඇත.
‘උද්ගතව ඇති අර්බුදය ව්‍යවස්ථානුකූලව විසඳීම සඳහා සහ රාජ්‍ය වියදම් අනුමත කිරීම සඳහා පාර්ලිමේන්තුව යළි රැස්කරන මෙන් කරන ඉල්ලීම’ යන ශීර්ෂයෙන් යුතු එම ලිපිය මංගල සමරවීර විසින් ඊයේ (අප්‍රේල් 28) පස්වරුවේ ජනාධිපති කාර්යාලය වෙත එම ලිපිය බාර දී තිබේ.
මෙම තීරණාත්මක අවස්ථාවේදී රාජ්‍ය නායකයා ලෙස සිය බලතල ක්‍රියාත්මක කර, පාර්ලිමේන්තුව නියෝජනය කරන සියලු පක්ෂවල සහාය ඇතිව හැකි ඉක්මනින් පාර්ලිමේන්තුව කැඳවන ලෙස මංගල සමරවීර හිටපු අමාත්‍යවරයා එම ලිපිය මගින් ජනාධිපති ගෝඨාභය රාජපක්ෂගෙන් ඉල්ලා සිටියි.
2020 අප්‍රේල් 30 වන දිනෙන් පසු රාජ්‍ය සේවයට වැටුප් ගෙවීම ඇතුළුව අත්‍යවශ්‍ය වියදම් නීත්‍යනුකූලව හා ව්‍යවස්ථානුකූලව අනුමත කිරීම සඳහා මෙය අත්‍යවශ්‍ය බව ඔහු එම ලිපිය මගින් අවධාරණය කර තිබේ.
එමගින් ශ්‍රී ලංකාව රාජ්‍ය මූල්‍ය කටයුතු සම්බන්ධයෙන් ආණ්ඩුක්‍රම ව්‍යවස්ථාවට ගරු කරමින් වගකීමෙන් යුතුව කටයුතු කරන රටක් බවට ජාත්‍යන්තරය වෙත සහතිකවීමේ හැකියාවක් ඇතැයි ද ඔහු පෙන්වා දී ඇත.
ජනාධිපති, අගමැති, අමාත්‍ය මණ්ඩලය සහ පාර්ලිමේන්තු මන්ත්‍රීවරුන් මෙන්ම භාණ්ඩාගාර ලේකම් ඇතුළු සියලුම රාජ්‍ය නිලධාරීන් ජනරජයේ ආණ්ඩුක්‍රම ව්‍යවස්ථාව ආරක්ෂා කිරීමට ප්‍රතිඥා දී ඇති බව මංගල සමරවීර එම ලිපිය මගින් සිහිපත් කර තිබේ.
අගමැති හා මුදල් අමාත්‍ය මහින්ද රාජපක්ෂ, හිටපු විපක්ෂනායක සජිත් ප්‍රේමදාස, හිටපු අගමැති රනිල් වික්‍රමසිංහ, හිටපු කතානායක කරු ජයසූරිය යන මහත්වරුන්ට මෙන්ම පාර්ලිමේන්තුව නියෝජනය කල දේශපාලන පක්ෂ නායක වන ආර් සම්බන්දන්, අනුර කුමාර දිසානයක, රවුෆ් හකීම් , රිෂාඩ් බදියුදීන්, මනෝ ගනේෂන් හා පී. දිගම්බරම් වෙත හා සියලුම මාධ්‍ය ආයතන වෙත ද පිටපත් සහිතව යොමුකර ඇති අදාළ ලිපියේ මෙසේ සඳහන් වේ.
01. ශ්‍රී ලංකාවේ රාජ්‍ය වියදම් 2020.04.30 දින දක්වා දැරීම සඳහා අතුරු සම්මත ගිණුමක් පාර්ලිමේන්තුව වෙත ඉදිරිපත් කළ
හිටපු මුදල් අමාත්‍යවරයා වශයෙන් මා ඔබට මෙම ලිපිය ලියමි.
02. ජනපතිවරණයක් පැවත්වෙන වසරවල දී ජයග්‍රහණය කරන ජනාධිපතිවරයාගේ ප්‍රතිපත්ති අනුව අය-වැයක් ඉදිරිපත් කිරීමට අවස්ථා සලසමින් අය-වැයක් සම්මත කිරීමෙන් බලයේ සිටි රජයන් වැළකී සිට ඇත.
03. 2019.11.16 වන දින ජනාධිපති මැතිවරණය පැවැත්වීමට යොදා තිබු බැවින් 2020 සඳහා විසර්ජන පනතක් සම්මත කර ගැනීම සුදුසු නොවන බව එවකට පැවති රජයේ අදහස විය. ඒ අනුව එවකට පැවති රජය, 2020 ජනවාරි 01වන දින සිට 2020 අප්‍රේල් 30 දක්වා මාස 4 කට බල පැවැත්වෙන පරිදි අතුරු සම්මත ගිණුමක් (Vote on Account) පාර්ලිමේන්තුවට ඉදිරිපත් කර 2019 ඔක්තෝම්බර් 23 දින සම්මත කර ගන්නා ලදී.
”එවකට පැවති රජය, 2020 ජනවාරි 01වන දින සිට 2020 අප්‍රේල් 30 දක්වා මාස 4 කට බල පැවැත්වෙන පරිදි අතුරු සම්මත ගිණුමක් (Vote on Account) පාර්ලිමේන්තුවට ඉදිරිපත් කර 2019 ඔක්තෝම්බර් 23 දින සම්මත කර ගන්නා ලදී.”
04. ඔබ රජය 2019 නොවැම්බර් මස බලයට පත්වී මාස තුනකට වැඩි කාලයක් ගතවූවද ඔබගේ මුදල් අමාත්‍යවරයා 2020 වසර සඳහා අය-වැයක් ඉදිරිපත් නොකළේය.
2014 වසරේ ද ජනපතිවරණයක් අභියස වූ හෙයින් ජනාධිපති මහින්ද රාජපක්ෂ මහතා විසින් මුදල් අමාත්‍යවරයා වශයෙන් 2015 වසර සඳහා අය-වැය ඉදිරිපත් නොකරන ලදී.
ඒ අනුව 2015 ජනවාරි 08 ජනපතිවරණය ජයග්‍රහණය කළ යහපාලන රජය මැතිවරණයෙන් දින 21 ක් වැනි කෙටි කාලයක් තුළ 2015 මුදල් වර්ෂය සඳහා අය-වැයක් ඉදිරිපත් කළ බව ඔබට සිහිපත් කිරීමට කැමත්තෙමි.
”2015 ජනවාරි 08 ජනපතිවරණය ජයග්‍රහණය කළ යහපාලන රජය මැතිවරණයෙන් දින 21 ක් වැනි කෙටි කාලයක් තුළ 2015 මුදල් වර්ෂය සඳහා අය-වැයක් ඉදිරිපත් කළ බව ඔබට සිහිපත් කිරීමට කැමත්තෙමි.”
05. 2020 වසර සඳහා විසර්ජන පනතක් ඉදිරිපත් කිරීම වෙනුවට 2020 මාර්තු 2 වන දින පාර්ලිමේන්තුව විසුරුවා හැරීමට මත්තෙන් යහපාලන රජය විසින් සම්මත කර තිබූ අතුරු සම්මත ගිණුම සංශෝධනය කිරීම සඳහා යෝජනාවක් ඉදිරිපත් කරන ලදී.
එවන් සංශෝධනයක් සඳහා ස්ථාවර නියෝග අනුව ප්‍රතිපාදන නොමැතිබව විපක්ෂය විසින් පෙන්වාදීමෙන් අනතුරුව රජය විසින්ම එය ඉල්ලා අස්කරගන්නා ලදී.
රටට හෙළිනොකළ හේතුන් මත අය-වැය ඉදිරිපත් නොකිරීමෙන් හා දැන් හදිස්සියේ මතුව ඇති කොරෝන හෙවත් කෝවිඩ්-19 වසංගතය හේතුවෙන් රට තුළ වසංගත, ව්‍යවස්ථාදායක හා ආර්ථික අර්බුදයක් උද්ගතව ඇත.
”රටට හෙළිනොකළ හේතුන් මත අය-වැය ඉදිරිපත් නොකිරීමෙන් හා දැන් හදිස්සියේ මතුව ඇති කොරෝන හෙවත් කෝවිඩ්-19 වසංගතය හේතුවෙන් රට තුළ වසංගත, ව්‍යවස්ථාදායක හා ආර්ථික අර්බුදයක් උද්ගතව ඇත.”
06. කොවිඩ්-19 වසංගතය ශ්‍රී ලංකාවේ ව්‍යාප්ත වීමෙන් මතුවූ බරපතල අවදානම් තත්ත්වය පිළිබඳව සලකා බලමින් 2020 අප්‍රේල් 25 වන දිනට නියමිත පාර්ලිමේන්තු මහ මැතිවරණය, 2020 ජුනි මස 20 වන දින පැවැත්වෙන බව මැතිවරණ කොමිෂන් සභාව විසින් 2020 අප්‍රේල් 20 වන දින ප්‍රකාශයට පත් කරන ලදී.
එහෙත් 2020 ජුනි මස 20 පැවැත්වීමට යෝජිත මහ මැතිවරණය පැවැත්වීමෙන් අනතුරුව නව පාර්ලිමේන්තුව රැස්වෙන දිනයක් මේ දක්වා නිල වශයෙන් ප්‍රකාශයට පත් කර නොමැත.
07. 2019 ඔක්තෝම්බර් 23 දින සම්මත කරන ලද අතුරු සම්මත ගිණුම අනුව, ආණ්ඩුක්‍රම ව්‍යවස්ථාවේ පැහැදිළිව සඳහන් පරිදි 2020 අප්‍රේල් 30 දිනෙන් පසුව රාජ්‍ය වියදම් දැරීම පිළිබඳව ජනපති ප්‍රමූඛ රජයට නීත්‍යනුකූල අවකාශයක් නොමැති බව අවධාරණය කරමි.
පාර්ලිමේන්තුව සතු මූල්‍ය බලතල ප්‍රකාරව එකී අනුමැතියකින් තොරව මුදල් අමාත්‍යවරයාට ප්‍රතිපාදන වෙන් කිරීමට බලය දිය නොහැකි අතර මහා භාණ්ඩාගාරයේ ලේකම් ද මුදල් අමාත්‍යවරයාගේ අනුමැතියෙන් තොරව රාජ්‍ය මුදල් කිසිදූ කටයුත්තකට වියදම් කිරීම නීති විරෝධී වනු ඇත.
”පාර්ලිමේන්තුව සතු මූල්‍ය බලතල ප්‍රකාරව එකී අනුමැතියකින් තොරව මුදල් අමාත්‍යවරයාට ප්‍රතිපාදන වෙන් කිරීමට බලය දිය නොහැකි අතර මහා භාණ්ඩාගාරයේ ලේකම් ද මුදල් අමාත්‍යවරයාගේ අනුමැතියෙන් තොරව රාජ්‍ය මුදල් කිසිදූ කටයුත්තකට වියදම් කිරීම නීති විරෝධී වනු ඇත.”
08. ශ්‍රී ලංකා ප්‍රජාතාන්ත්‍රීක සමාජවාදී ජනරජයේ ආණ්ඩුක්‍රම ව්‍යවස්ථාවෙහි 150 ව්‍යවස්ථාවේ 03 වන වගන්තිය ප්‍රකාර පාර්ලිමේන්තුව විසිරුවා ඇති අවස්ථාවක හා විසර්ජන කෙටුම්පතක් සම්මත නොවූ සන්ධර්භයක් තුළ රජයේ වියදම් දැරීම සඳහා අවකාශයක් ඇත.
එයට අදාළ ව්‍යවස්ථාමය ප්‍රතිපාදනය පහත දැක්වේ.
150 (3)- “කිසියම් වර්ෂයක විසර්ජන පනත් කෙටුම්පත නිතිය බවට පත්වීමට පෙර ජනාධිපතිවරයා විසින් පාර්ලිමේන්තුව විසිරුවා හරිනු ලැබූ අවස්ථාවක පාර්ලිමේන්තුව විසින් රජයේ සේවාවන් සඳහා මුදල් වෙන් කර නොමැත්තේ නම් අභිනව පාර්ලිමේන්තුව රැස්වීමට නියමිත දින සිට මාස 3ක් ඉකුත් වන තෙක් රජයේ සේවාවන් සඳහා යම්කිසි මුදලක් අවශ්‍ය වෙතැයි ජනාධිපතිවරයා සලකයි නම් එම මුදල ඒකාබද්ධ අරමුදලෙන් නිකුත් කිරීමටත් වැය කිරීමටත් නියම කිරීමට ජනාධිපතිවරයාට බලය ඇත්තේය.” යථෝක්ත ව්‍යවස්ථාවෙහි සදහන් ප්‍රතිපාදන ප්‍රකාර ඒකාබද්ධ අරමුදලෙන් මුදල් නිකුත් කිරීමට හා වැය කිරීමට ජනාධිපතිතුමාට බලය ලැබෙනුයේ අභිනව පාර්ලිමේන්තුව කැඳවන දිනයේ සිට මාස 3ක් ඉකුත් නොවන තෙක් පමණි.
”යථෝක්ත ව්‍යවස්ථාවෙහි සදහන් ප්‍රතිපාදන ප්‍රකාර ඒකාබද්ධ අරමුදලෙන් මුදල් නිකුත් කිරීමට හා වැය කිරීමට ජනාධිපතිතුමාට බලය ලැබෙනුයේ අභිනව පාර්ලිමේන්තුව කැඳවන දිනයේ සිට මාස 3ක් ඉකුත් නොවන තෙක් පමණි.”
09. ජනාධිපති, අග්‍රාමාත්‍ය ඇතුළු අමාත්‍ය මණ්ඩලය හා පාර්ලිමෙන්තු මැති ඇමතිවරු මෙන්ම භාණ්ඩාගාරයේ ලේකම් ඇතුළු රාජ්‍ය නිලධාරීන් සියලු දෙනා ජනරජයේ ආණ්ඩුක්‍රම ව්‍යවස්ථාව කඩ නොකර ආරක්ෂා කරන බවට ප්‍රතිඥා දී ඇත.
එය කඩ කරන ඔනෑම පුද්ගලයෙකු අභියාචනාධිකරණය විසින් වරදකරු කරනු ලැබු විට එම විධිවිධාන කඩකරමින් ක්‍රියා කරන කවර වූව ද තැනැත්තෙකු අභියාචනාධිකරණය විසින් වරදකරු කරනු ලැබූ විට :-
(ආ) අවුරුදු හතක් නොඉක්මවන කාලයක් සඳහා ප්‍රජා අයිතිය අහිමිවීමට යටත් වන අතර
(ආ) පවුලේ අයගේ ජීවිකා වෘත්තිය පවත්වාගෙන යාම පිණිස අවශ්‍යයයි අධිකරණ ආඥාවක් මගින් තීරණය කරනු ලබන දේපල හැර, ඔහුගේ චංචල සහ නිශ්චල දේපල රාජසන්තක වන්නේය.
10. එබැවින්, පත්ව ඇති මේ අවදානම් අවස්ථා සැලකිල්ලට ගෙන පාර්ලිමේන්තුව නියෝජනය කරන සියලු පක්ෂ වල සහාය ලබා ගෙන 2020.04.30 න් පසුව රාජ්‍ය සේවාවට වැටුප් ගෙවීම ඇතුළු අත්‍යාවශ්‍ය වියදම් අනුමත කරවාගැනීමට වහා පාර්ලිමේන්තුව යළි රැස් කරන මෙන් විධායකෙයේ ප්‍රධානිය වශයෙන් හිතවත් ජනාධිපති තුමන් ගෙන් කාරුණිකව ඉල්ලා සිටිමි.”
theleader.lk