වසංගතය පාලනයේ මුවාවෙන් හදිසි නීතිය පනවා ආණ්ඩුව උත්සාහ කරන්නේ මානව අයිතිවාසිකම් උල්ලංඝනය කරන ඒකාධිපති යුගයකට මුල පිරීමට යයි රටේ ප්‍රධාන පාර්ලිමේන්තු විපක්ෂය චෝදනා කරයි. දැඩි ස්වරයෙන් යුතුව සමගි ජන බලවේගය ප්‍රකාශ කර ඇත්තේ වැරදි ආර්ථික පිළිවෙත් සහ දූෂණ වංචා හේතුකොටගෙන අසමත් භාවය වසා ගැනීම සඳහා ආණ්ඩුව විසින් මහජන ආරක්ෂක පනත ප්‍රකාශයට පත් කර ඇති බවයි.
“හදිසි නීතිය දැම්මාම වැක්සින් ප්‍රමාණය වැඩිවෙනවද, ආසාදිතයන් අඩුවෙනවද, මරණ සංඛ්‍යාව අඩුවෙනවද? යි විපක්ෂ නායක සජිත් ප්‍රේමදාස වීඩියෝ නිවේදනයක් නිකුත් කරමින් ආණ්ඩුවෙන් ප්‍රශ්න කර ඇත.
“ප්‍රජාතන්ත්‍රවාදී අයිතීන් විනාශ කරලා රජයට රිසිසේ මෙරටේ ප්‍රතිවාදී මතයන් දරන විපක්ෂය කෙසේ හෝ මර්දනයෙන් කළමනාකරණය කර ගැනීමටයි උත්සාහ කරන්නේ. හදිසි නීතිය ගෙනවිත් මානව අයිතිවාසිකම් උල්ලංඝනය කරන ඒකාධිපති යුගයකට මුල පුරන්ඩයි උත්සාහ කරන්නේ” 2006 අංක 13 දරන ආපදා කළමනාකරණ පනතේ විධිවිධාන වසංගත පාලනය සඳහා ප්‍රමාණවත් බව විපක්ෂ නායකයා කියා සිටී.
මහජන ආරක්ෂක ආඥා පනතේ බලතල යොදා ගනිමින් අත්‍යාවශ්‍ය ආහාර සැපයීමට අදාළ හදිසි නීති රෙගුලාසි අගෝස්තු 30 වැනිදා මධ්‍යම රාත්‍රියේ සිට බලපැවැත්වෙන පරිදි ක්‍රියාත්මක කරන බව ජනාධිපති ගෝඨාභය රාජපක්ෂ විසින් ප්‍රකාශයට පත් කර තිබුනි. මිල පාලනයක් පවත්ගෙන යමින් අත්‍යාවශ්‍ය ආහාර ද්‍රව්‍ය බෙදාහැරීම සඳහා රටේ සාමාන්‍ය නීතිය සෑහෙන බව ප්‍රකාශ කරන සජිත් ප්‍රේමදාස ආණ්ඩුව සැලසුම ප්‍රජාතන්ත්‍රවාදය වෙනුවෙන් කටයුතු කරන පුද්ගලයන් දඩයම් කිරීමේ වෑයමක් ලෙස හෙලා දැකීය.
“අපි තරයේ විශ්වාස කරනවා හදිසි නීතියක් අවශ්‍ය නෑ මේ රටේ භාණ්ඩවල මිල පාලනය කරන්න. එය ඉතාමත්ම හොඳින් වර්තමානයේ තියෙන නීතිමය ප්‍රතිපාදන හරහා ක්‍රියාත්මක කරන්න පුළුවන්. අපිට පේනවා මෙන්න මෙහෙමං දෙයක්. රජය උත්සාහ දරනවා මේ භාණ්ඩ හිඟතාව, බඩු මිල වැඩිවීම තුල හදිසි නීතිය සක්‍රීය කරලා මේ රටේ ප්‍රජාතන්ත්‍රවාදයට මරු පහරක් එල්ල කරන්න. ප්‍රජාතන්ත්‍රවාදී ක්‍රියාවල නිරත වෙන අයව රාජ්‍ය දඩයමට ලක් කරන්න.”
සමගි ජන බලවේගයේ මහලේකම් රන්ජිත් මද්දුම බණ්ඩාර නිවේදනයක් නිකුත් කරමින් ප්‍රකාශ කර තිබුනේ 2003 අංක 9 දරන පාරිභෝගික කටයුතු අධිකාරිය පනත භාණ්ඩ මිල පාලනය සඳහා ප්‍රමාණවත් බවයි. ජනාධිපතිවරයා විසින් හදිසි නීතිය ප්‍රකාශයට පත් කිරීම ඒකාධිපතිවාදය කරා යාම සඳහා සිදුකරන ලද ම්ලේච්ඡ ක්‍රියාවක් බව ඔහු සඳහන් කර තිබිණ. “අපි ඉල්ලීමක් කරනවා ප්‍රජාතන්ත්‍රවාදය විනාශ කරන මේ ම්ලේච්ඡ ක්‍රියාව වහාම නතර කරන්න.
මේ රටට අවශ්‍ය වන්නේ ඒකාධිපතිත්වයක් නොවෙයි. මුළු බලය එක තැනක කේන්ද්‍ර වීම නොවේ. මේ රටට ඒකාධිපතිත්වයකින් කිසිදු වැඩක් නැහැ.” හදිසි නීතිය වහාම ඉවත් කරගෙන වසංගතයට මුහුණ දීම සඳහා ගැලපෙන නීති සම්පාදනය කරන තුරු ආපදා කළමනාකාර පනතේ ප්‍රතිපාදන ක්‍රියාවේ යොදවමින් ජාතික ආපදා කළමනාකරණ මණ්ඩලය කැඳවන ලෙස සමගි ජන බලවේගය ජතාධිපතිවරයාගෙන් ඉල්ලා සිටී.
එම් ඒ සුමන්දිරන්
සෞඛ්‍ය ආරක්ෂණය සදහා අලුතින් පොදු නීතියක් සකස් කිරීම සඳහා පාර්ලිමේන්තුවට ඉදිරිපත් කොට ඇති කෙටුම්පත සම්මත නොකර මර්දනකාරී අනපනත් ක්‍රියාවේ යෙදවීම ගැන ජනාධිපතිවරයා දෙමළ ජාතික සන්ධානයේ ද දැඩි දෝෂ දර්ශනයට ලක්වී තිබුණි. එම් ඒ සුමන්දිරන් මන්ත්‍රීවරයා විසින් පෞද්ගලික මන්ත්‍රී යෝජනාවක් ලෙසින් ඉදිරිපත් කොට තිබෙන එම කෙටුම්පත මහජන සෞඛ්‍ය ආරක්ෂක තත්වයක් ප්‍රකාශ කිරීමට, මහජන සෞඛ්‍යය සඳහා විශේෂ පියවර ගැනීමට සහ ඊට අදාළ කරුණු සම්බන්ධයෙන් කටයුතු කිරීමට යොදාගත හැකි පනතක් ලෙස හඳුන්වා දී තිබේ.
theleader.lk